اویس کیانی: وفاقی وزیرداخلہ محسن نقوی سے ایم این اے حمید حسین کی قیادت میں کرم سے تعلق رکھنے والے وفد کی ملاقات ہوئی ۔
وفاقی وزیرداخلہ محسن نقوی سے مجلس وحدت المسلمین کے ایم این اے حمید حسین کی قیادت میں کرم سے تعلق رکھنے والے وفد کی ملاقات ہوئی ۔ محسن نقوی نے کرم میں پیش آنے والے افسوسناک واقعات پر سخت تشویش کا اظہار کیا۔ ملاقات میں مستقبل میں ایسے واقعات کی روک تھام کیلئے جامع حکمت عملی ترتیب دینے پر تبادلہ خیال کیا گیا ۔
وزیرداخلہ نے قیمتی انسانی جانوں کے ضیاع پر گہرے دکھ اور افسوس کا اظہار کیا، اور زخمیوں کی جلد صحتیابی کیلئے دعا کی۔
محسن نقوی کا کہنا تھا کہ دو گروپوں کے درمیان تصادم کو غلط رنگ دیا گیا۔ علاقے کی سرکردہ شخصیات کو اس ایشو کے پائیدار حل کیلئے اپنا مثبت کردار ادا کرنا ہے۔حکومت معاملے کے حل کیلئے ہر ممکن معاونت فراہم کرے گی۔ علاقے میں بھائی چارے اور ہم آہنگی کو برقرار رکھنے کیلئے سب کومل کر کردار کرنے کی ضرورت ہے۔
وفاقی وزیرداخلہ محسن نقوی نے کرم کے دونوں گروپوں کے سرکردہ شخصیات پر نمائندہ وفد کو بھی ملاقات کے لئے بلا لیا۔
وفد میں منیر حسین، پروفیسر شبیر بنگش، محمد بشیر بنگش، رحیم گل اور حاجی نور رحمان شامل تھے، وفاقی سیکرٹری داخلہ خرم علی آغا بھی اس موقع پر موجودتھے ۔