قیصر کھوکھر:پنجاب میں قومی انسداد پولیو مہم کا آغاز 3فروری سے ہوگا،لاہور، راولپنڈی،فیصل آباد میں مہم 9 فروری، دیگر اضلاع میں 7 فروری تک جاری رہے گی۔
مہم کے دوران پنجاب میں 2 کروڑ 33 لاکھ بچوں کو ویکسیئن کے قطرے پلانے کا ہدف رکھا گیا ہے۔اس حوالے سے انسداد پولیو مہم کا جائزہ لینے کیلئےچیف سیکرٹری زاہد اختر زمان کی زیر صدارت اجلاس ہوا۔چیف سیکرٹری نے انسدادپولیو مہم موثر اور کامیاب بنانے کی ہدایت کرتے ہوئے کہا کہ ماحولیاتی نمونوں میں پولیو وائرس کی موجودگی تک خطرہ برقرار ہے،ڈپٹی کمشنرز انسداد پولیو مہم کی خودنگرانی کریں۔
چیف سیکرٹری کے مطابق سکولوں میں امتحانات کے پیش نظر مہم میں محکمہ تعلیم سے کم سے کم عملہ کی خدمات لینے کا فیصلہ کیا گیا ہے۔ڈیجیٹائزیشن کے ذریعے مائیکرو پلانز کو بہتر بنایا جا سکتا ہے۔
انہوں نے ڈپٹی کمشنرز کو ہدایت کی کہ ٹرانزٹ پوائنٹس پر ویکسیئن کے قطرے پلانے کیلئے اقدامات کئے جائیں۔ اس موقع پر سیکرٹری پرائمری ہیلتھ نادیہ ثاقب نے اجلاس کو تفصیلی بریفنگ دی۔