عامر لیاقت ہسپتال میں داخل، عوام سے دعاؤں کی اپیل

(مانیٹرنگ ڈیسک) پاکستان تحریک انصاف کے رکنِ قومی اسمبلی عامر لیاقت حسین طبیعت ناساز ہونے پر کراچی کے ساؤتھ سٹی ہسپتال میں داخل، فوزیہ صدیقی نے عوام سے دعاؤں کی اپیل کردی۔  

پی ٹی آئی ویمن ونگ کراچی کی انفارمیشن سیکرٹری فوزیہ صدیقی نے عامر لیاقت کی ہسپتال میں کھینچی گئی تصویر ٹوئٹر پر شیئر کی ہے، اس تصویر میں عامر لیاقت ہسپتال کے بیڈ پر بے سدھ پڑے نظر آ رہے ہیں۔

 فوزیہ صدیقی نے  تصویر شیئر کرتے ہوئے لکھا کہ دعائے صحت کی اپیل، ایم این اے ڈاکٹر عامر لیاقت حسین شدید علالت کے باعث نجی ہسپتال میں داخل ہیں، اللہ پاک ڈاکٹر عامر لیاقت حسین کو صحت کاملہ عطا فرمائے آمین۔

خیال رہے کہ اس سے قبل عامر لیاقت حسین کے آفیشل ٹوئٹر اکاؤنٹ سے ٹویٹ کیا گیا تھا کہ عامر لیاقت حسین کی حالت تشویشناک ساؤتھ سٹی ہسپتال منتقل کیا جارہا ہے، ابھی تک یہ معلوم نہیں ہوا کہ انہیں کس بیماری کے باعث ہسپتال میں داخل کرایا گیا۔