(مانیٹرنگ ڈیسک) سعودی عرب کی تاریخ میں پہلی بار نئے اسلامی سال کے آغاز پر یکم محرم کو غلافِ کعبہ کی تبدیلی کی گئی۔
گورنر مکہ مکرمہ شہزادہ خالد الفیصل نے غلاف کعبہ کے کلید بردار ڈاکٹر صالح الشیبی کے حوالے کیا تھا۔ یکم محرم سے بیرون ممالک کے عمرہ زائرین کی آمد بھی شروع ہوگئی اور عمرہ ویزے کی میعاد پہلی بار 3 ماہ کردی گئی ہے.
عمرے پر آئے زائرین ملک میں کہیں بھی آجاسکتے ہیں۔
واضح رہےکہ سینکڑوں کلو گرام ریشم، چاندی اور سنہری دھاگوں سے تیار کیا جانے والا خانہ کعبہ کا غلاف کئی دہائیوں سے ہر سال ذوالحجہ کے اسلامی مہینے میں حج کے موقع پر 9 ذوالحجہ کو تبدیل کیا جاتا رہا ہے،ہر سال غلاف کعبہ کی تبدیلی کی تقریب نماز عشا کے بعد قریب پانچ گھنٹے تک جاری رہتی تھی۔
تاہم 2022 میں اس روایت میں تبدیلی لائی گئی ہے اور رواں برس نئے اسلامی سال کے آغاز پر یعنی یکم محرم الحرام کو غلاف کعبہ تبدیل کیا گیا۔
خانہ کعبہ کی دیواروں اور باب کعبہ (دروازہِ کعبہ) کو جس کپڑے سے ڈھانپا جاتا ہے اسے غلاف کعبہ یا کسوہ (عربی: كسوة الكعبة) کہتے ہیں۔