سٹی 42 : ایف آئی اے نے  چھاپہ مار کارروائیوں کے دوران 2 انسانی سمگلر گرفتار کرلیے ۔ 

 وفاقی وزیر داخلہ محسن رضا نقوی کی ہدایات پر انسانی سمگلنگ میں ملوث عناصر کے خلاف گھیرا تنگ کردیا گیا ہے ۔ 

گرفتار ملزموں کی شناخت معز بٹ اور محمد یاسین کے نام سے ہوئی ، جو ویزا فراڈ اور انسانی سمگلنگ میں ملوث پائے گئے۔ ملزموں کو چھاپہ مار کارروائی میں سیالکوٹ اور گوجرانوالہ سے گرفتار کیا گیا۔ 

 ملزم محمد یاسین نے شہری کو قطر بھجوانے کا جھانسہ دے کر 5 لاکھ 60 ہزار روپے سے زائد رقوم بٹوری، جبکہ ملزم معیز بٹ نے شہری کو آسٹریا بھجوانے کے لیے لاکھوں روپے بٹورے۔

دونوں ملزم شہریوں کو بیرون ملک بھجوانے میں ناکام رہے اور روپوش ہو گئے۔ دونوں کو گرفتار کر کے تفتیش کا آغاز کر دیا گیا ہے ۔ 

ڈائریکٹر گجرانوالہ زون عبدالقادر قمر کا کہنا ہے کہ انسانی سمگلنگ میں ملوث عناصر کے خلاف کریک ڈاون جاری ہے۔