عابد چودھری: نجی ٹی وی چینل کے کرائم رپورٹر حسنین شاہ پر موٹرسائیکل سواروں نے فائرنگ کرکے  قتل کردیا تھا ۔ ملزم شملہ پہاڑی ڈیوس روڈ پر گولیاں مار کر فرار  ہوگئے تھے، گولیاں مارنے والے 2 ملزمان موٹر سائیکل پر سوار تھے۔

ملزم عامر بٹ نے حسنین شاہ کو قتل کروانے کا اعتراف کر لیا ہے۔ پولیس کے مطابق ملزم نے لین دین کے تنازعے پر اجرتی قاتلوں سے حسنین شاہ کو قتل کرایا۔ اس واقعے کی فوٹیج بھی سامنے آچکی ہے،  شوٹر کو گاڑی کی دائیں جانب سے فائرنگ کرتے دیکھا جا سکتا ہے۔ ملزم دس سے زائد فائر کر کے موقع سے فرار ہوا۔

موٹرسائیکل سوار شوٹر کو اس کا ساتھی گاڑی سے مکمل ریکی کر کے معلومات دے رہا تھا۔ گرفتار ملزم عامر بٹ نے اپنے بھائی شاہد بٹ اور دوست فرحان کے ساتھ مل کر قتل کرنے کا منصوبہ بنایا تھا۔ پولیس کا کہنا ہے کہ گرفتار ملز م فرحان شاہ نے عامر بٹ کے کہنے پر پانچ لاکھ میں شوٹر ہائر کروایا تھا۔

گرفتار ملزمان میں عامر بٹ مالک گولڈ ایشیا جیولر، فرحان شاہ، امجد پاشا اور سید حیدر عباس شامل ہیں جبکہ ملزمان  زین عرف عبداللہ (شوٹر)، یاسر عر ف رگو (شوٹر)، سید طاہر شاہ، شاہد بٹ(بھائی عامر بٹ) تاحال پولیس کی گرفت میں نہیں آ سکے ہیں۔