(حافظ شہباز علی) بنگلہ دیش کے خلاف ٹیسٹ سیریز کی تیاریوں کے لئے تین روزہ پریکٹس میچ کے پہلے روز شان مسعود اور بابر اعظم کی شاندار سنچریاں، کپتان اظہر علی بغیر کوئی رن بنائے پویلین لوٹ گئے۔
بنگلہ دیش کےخلاف ٹی ٹوئنٹی سیریز میں کامیابی کے بعد شاہینوں نے ٹیسٹ سیریز کی تیاریوں کا آغاز کردیا، قذافی اسٹیڈیم میں تین روزہ پریکٹس میچ کے پہلے روز اوپنر شان مسعود اور بابر اعظم نے سنچریاں اسکورکرکے اپنی افادیت ثابت کردی، کپتان اظہر علی کھاتہ کھولے بغیر ہی پویلین واپس لوٹ گئے، شان مسعود 103 اور بابر اعظم 101 رنز بناکر ریٹائرڈ ہوئے۔ محمد رضوان 45 اور فہیم اشرف 21 رنز کے ساتھ وکٹ پر موجود ہیں، موسیٰ خان نے دو اور بلال آصف نے ایک کھلاڑی کو آؤٹ کیا۔
میچ کے اختتام پر میڈیا سے گفتگو کرتے ہوئے اوپنر عابد علی کا کہنا تھا کہ بھر پور تیاری کررہے ہیں کوشش کروں گا کہ بہترین کارکردگی کا مظاہرہ کرتےہوئے تیسرے میچ میں بھی سنچری اسکور کر کے اظہر الدین کا ریکارڈ برابر کروں گا۔عابد علی کا کہنا تھا کہ ٹی ٹوئنٹی سیریز میں کامیابی کے بعد مورال بلند ہے کوشش کریں گے کہ ٹیسٹ سیریز میں بھی کامیابی حاصل کریں۔
میچ کے دوران فیلڈنگ کوچ گرانٹ بریڈ برن اور ٹرینرکلف ڈیکن کھلاڑیوں کی فزیکل کو فیلڈنگ اور فزیکل ٹریننگ کی ڈرلز کرواتے رہے، میچ کے دو سرے روز محمد رضوان اور فہیم اشرف پہلی اننگ کا دوبارہ آغاز کریں گے۔