سٹی 42 :محکمہ موسمیات نے کہا ہے کہ ملک کے بیشتر علاقوں میں موسم سرد اورخشک جبکہ پہاڑی علاقوں میں شدیدسرد اور مطلع جزوی ابر آلود رہنے کا امکان ہے، جبکہ پنجاب ، خیبر پختو نخوا کے زیادہ ترمیدانی علا قوں اور بالائی سندھ میں درمیانی اورشدید دُھند چھائے رہنے کی توقع ہے۔

سوموار کے روز موسم کی صورتحال کے متعلق محکمہ موسمیات کا کہنا ہے کہ اسلام آباد اور گردونواح میں موسم سرد اورخشک جبکہ صبح کے اوقات میں شدید سرد/ کہرا پڑنے کا امکان ہے۔ خیبرپختونخوا کے بیشتر اضلاع میں موسم سرد اور مطلع جزوی ابر آلود رہنے کا امکان ہے، پہاڑی علاقوں میں صبح اور رات کے اوقات میں شدیدسرد رہنے کی توقع ہے، جبکہ شام/رات کے اوقات میں چترال، دیر، سوات، کو ہستان ، با جوڑ اور گردونواح میں چند مقامات پر ہلکی بارش/ہلکی برفباری کی تو قع ہے۔ صبح کے اوقات میں صوابی، مردان، پشاور، نوشہرہ، کوہاٹ،بنوں، ڈیرہ اسماعیل خان اور گردو نواح میں چند مقامات پرہلکی سے درمیانی دھند پڑنے کی توقع ہے ۔ 

محکمہ موسمیات کے مطابق پنجاب کے بیشتر اضلاع میں موسم سرد اور خشک رہنے کی توقع ہے، جبکہ مری، گلیات اور گردو نواح میں موسم شدید سرد اور صبح کے اوقات میں کہرا پڑنے کا امکان ہے، تاہم صبح/رات کے اوقات میں سیالکوٹ، نارووال ،گوجرانوالہ، منگلا، جہلم ، راولپنڈی، لاہور، شیخوپورہ، قصور ،ا وکاڑہ، ساہیوال،سرگودھا، ٹوبہ ٹیک سنگھ، حافظ آباد، فیصل آباد، جھنگ،بھکر، لیہ ، ملتان،بہاولپور، بہا ولنگر،خانیوال، خانپور، رحیم یار خان ،ڈی جی خان اور گردونواح میں درمیانی سے شدید دھند چھائے رہنے کی توقع ہے ۔ 

محکمہ موسمیات کا کہنا ہے کہ بلوچستان کے بیشتر اضلاع میں موسم سرد اور مطلع جزوی ابر آلود رہنے کا امکان ہے، پہاڑی علاقوں میں صبح اور رات کے اوقات میں شدیدسرد رہنے کی توقع ہے، جبکہ شام/رات کے اوقات میں کو ئٹہ، پشین، زیارت، قلعہ عبدا للہ ، قلعہ سیف اللہ، ژوب اور گردونواح میں چند مقامات پر ہلکی بارش/ہلکی برفباری کی تو قع ہے۔ سندھ کے بیشتر اضلاع میں موسم سرد اورخشک رہنے کا امکان ہے، تاہم صبح /رات کے اوقات میں سکھر ، شہید بینظیر آباد،شکارپور، کشمور، خیر پور، مو ہنجو دارو اور گردونواح میں درمیانی سے شدید دھند چھائے رہنے کی توقع ہے۔ اس کے علاوہ کشمیر اور گلگت بلتستان میں موسم شدید سرداور شام/رات میں مطلع ابر آلود رہنے کے علاوہ ہلکی بارش / ہلکی برفباری کا امکان ہے۔