سٹی 42 : شدید دھند کے باعث موٹروے ایم 2، ایم 3، ایم 4 اور ایم 5 کے بعد ایم 11 بھی ہر قسم کی ٹریفک کے لیے بند کردی گئی ۔
ترجمان موٹروےپولیس کے مطابق لاہور اسلام آباد موٹروے ایم 2 ٹھوکر نیاز بیگ سے بابو صابو تک، اور لاہور ملتان موٹروے ایم 3 فیض پور سے ننکانہ تک دھند کی وجہ سے بند کردی گئی ۔ اس سے قبل موٹروے ایم 4 عبد الحکیم سے ملتان تک ،موٹروے ایم 5 شیر شاہ ملتان سے ظاہر پیر تک دھند کی وجہ سے بند کردی گئی تھی ۔اس کے علاوہ لاہور سیالکوٹ موٹروے ایم 11 کو بھی ہر قسم کی ٹریفک کے لئے بند کر دیا گیا ۔
ترجمان موٹروے پولیس سید عمران احمد کا کہنا ہےکہ موٹرویز کو عوام کی حفاظت اور محفوظ سفر یقینی بنانے کے لیے بند کیا جاتا ہے، شہری زیادہ سے زیادہ دن کے اوقات پر سفر کرنے کو ترجیح دیں، صبح 10 سے شام 6 بجے تک دھند کے موسم میں بہترین سفری اوقات ہیں، ڈرائیور حضرات آگے اور پیچھےدھند والی لائٹس کا استعمال کر یں، عوام غیر ضروری سفر سے گریز کریں، تیز رفتاری سے پرہیز کر یں اور اگلی گاڑی سے مناسب فاصلہ رکھیں۔
ترجمان موٹروے پولیس کا کہنا ہے کہ معلومات اور مدد کے لیے ہیلپ لائن 130 سے رابطہ کریں ۔