(اسرار خان)بیٹے کی پیدائش کی خوشی میں مٹھائی دینے کے بہانے پر ڈکیتی کا معاملہ، سٹی فورٹی ٹو نے واردات کی سی سی ٹی وی فوٹیج حاصل کر لی۔
تفصیلات کے مطابق سی سی ٹی وی فوٹیج میں پتلون شرٹ میں ملبوس موٹر سائیکل سوار 2 ملزموں کو دیکھا جا سکتا ہے، جو 3 بج کر 49 منٹ پر متاثرہ شہری حاجی اکمل کے گھر کی گھنٹی بجاتے ہیں، ایک ملزم کے ہاتھ میں پکڑے شاپنگ بیگ میں مٹھائی کا ڈبہ نظر آتا ہے، ملزم اپنی موٹر سائیکل گھر کے باہر کھڑی کر کے گھر میں داخل ہو جاتے ہیں، واردات کے بعد ملزم چار بج کر 35 منٹ پر گھر سے نکلتے ہیں۔
مزید پڑھئے: 74لاکھ کی آدھا کلو مٹھائی، بیٹے کی پیدائش پرشہری جمع پونجی سےمحروم
ملزمان کے ہاتھ میں پکڑے تھیلوں میں سامان بھی دکھائی دیتا ہے،واردات گزشتہ روز مغلپورہ کے علاقہ میاں پارک کے رہائشی مقامی تاجر حاجی اکمل کے گھر ہوئی تھی، ڈاکو 55 لاکھ روپے نقدی اور 10 تولے طلائی زیورات لوٹ کر فرار ہو گئے تھے۔
واضح رہے کہ گزشتہ روز مغلپورہ کے رہائشی حاجی اکمل کے گھر میں ڈاکو مٹھائی دینے کے بہانے داخل ہوئے ،گھر میں داخل ہوتے ہی مٹھائی کے ڈبے سے پستول نکال کر تان لیا اور اہل خانہ کو یرغمال بنا کر لوٹ مار شروع کر دی، پولیس کے مطابق ڈاکو گھر سے 57 تولے سونا اور دس لاکھ نقدی لوٹ کر فرار ہوئے ۔
پولیس کے مطابق مٹھائی کے ڈبے میں ڈاکووں نے پستول رکھا ہوا تھا، اہل خانہ کو یرغمال بنا کر واردات کی گئی ،پولیس نے موقع پر پہنچ کر کارروائی کا آغاز کر دیا ،موقع پر لگے سی سی ٹی وی کیمروں کی مدد بھی حاصل کر لی گئی ہے۔