سٹی 42 : چئیرمین پی سی بی محسن نقوی نے کہا ہے کہ طویل عرصے بعد پاکستان میں آئی سی سی ٹورنامنٹ کا انعقاد ہو رہا ہے، چیمپئنز ٹرافی ایونٹ کو یادگار بنائیں گے۔ 

چئیرمین پی سی بی نے راولپنڈی کرکٹ اسٹیڈیم کا دورہ کیا، انہوں نے اپ گریڈیشن پراجیکٹ پر پیشرفت کا جائزہ لیا۔ محسن نقوی نے پویلین، میڈیا باکس، وی آئی پی باکسز سمیت مختلف حصوں کا معائنہ کیا، انہوں نے فنشنگ ورک بھی دیکھا ۔ 

محسن نقوی نے اپ گریڈیشن پراجیکٹ پر پیشرفت پر اطمینان کا اظہارکیا۔ انہوں نے اس موقع پر کہا کہ راولپنڈی کرکٹ اسٹیڈیم کی تزئین و آرائش کا کام آخری مراحل میں داخل ہوچکا، مین پویلین اور میڈیا باکس کی تزئین و آرائش کا کام مکمل ہوچکا ہے، کرسیوں کی تنصیب کوچند روز میں مکمل کر لیا جائے گا ۔ 

چیئرمین پی سی بی نے ٹیموں کیلئے مجوزہ سیکورٹی انتظامات کا بھی جائزہ لیا ۔ محسن نقوی نے کہا کہ طویل عرصے بعد پاکستان میں آئی سی سی ٹورنامنٹ کا انعقاد ہو رہا ہے، میگا ایونٹ کے شاندار انعقاد کیلئے تمام تیاریاں مکمل ہیں۔ انہوں نے کہا کہ چیمپئنز ٹرافی ایونٹ کو یادگار بنائیں گے، امید ہے شائقین کرکٹ کو بہترین کرکٹ دیکھنے کو ملے گی ۔