ویب ڈیسک : امریکا نے چینی ٹیلی کام کمپنی چائنا یونی کام پر قومی سلامتی اور جاسوسی کے خدشات کی وجہ سے پابندی عائد کر دی۔
فیڈرل کمیونیکیشن کمیشن (ایف سی سی) نے اس حوالے سے کہا کہ انہوں نے کمپنی کے امریکی یونٹ کو امریکہ میں کام کرنے کی اجازت کو منسوخ کرنے کے لیے متفقہ طور پر ووٹ دیا ہے۔فرم کو 60 دنوں کے اندر امریکہ میں ٹیلی کام خدمات فراہم کرنا بند کر دینا چاہیے۔
یہ اعلان اس وقت سامنے آیا ہے جب بڑے حریف چائنا ٹیلی کام کا امریکہ میں کام کرنے کا لائسنس اکتوبر میں منسوخ کر دیا گیا تھا۔ایف سی سی کی چیئر وومن جیسیکا روزن ورسل نے کہا کہ کچھ شواہد ملے ہیں اور اس کے ساتھ ایک بڑھتی ہوئی تشویش ہے کہ چینی سرکاری کیریئرز ہمارے ٹیلی کمیونیکیشن نیٹ ورکس کی سلامتی کے لیے حقیقی خطرہ ہیں۔
چائنا یونی کام کے مطابق امریکی یونٹ کا متعلقہ امریکی قوانین اور ضوابط کی تعمیل کرنے اور گزشتہ دو دہائیوں میں اپنے صارفین کے قابل اعتماد شراکت دار کے طور پر ٹیلی کمیونیکیشن خدمات اور حل فراہم کرنے کا ایک اچھا ریکارڈ ہے۔
کمپنی کا کہنا تھا کہ چائنا یونی کام (ہانگ کانگ) لمیٹڈ اس صورت حال کو قریب سے دیکھے گا۔واشنگٹن میں چینی سفارت خانے نے فوری طور پر بی بی سی کی جانب سے تبصرہ کرنے کی درخواست کا جواب نہیں دیا۔