سٹی42: بلوچستان میں مون سون کی حالیہ بارشوں نے تباہی مچا دی، 24 گھنٹوں میں بارش کی وجہ سے ہونے والے حادثات میں 5 افراد جان بحق اور 14 افراد زخمی ہو گئے۔
پی ڈی ایم اے نے حالیہ بارش کے باعث بلوچستان میں انسانی جانوں اور املاک کے نقصانات کی رپورٹ جاری کر دی ہے، گزشتہ 24گھنٹوں کے دوران مزید 5 افراد بارش سے ہونے والے حادثات میں ہالک ہوئے۔ بلوچستان مین حالیہ مون سون میں بارش کے سبب فوت ہونے والوں کی تعداد 29 ہوگئی، جاں بحق ہو نے والوں میں ایک خاتون اور 17بچے بھی شامل ہیں۔
پی ڈی ایم اے کی رپورٹ کے مطابق بارشوں کے سبب حادثات میں 14 افراد زخمی ہوئے جن میں ایک خاتون اور 11بچے شامل ہیں۔
بلوچستان میں بارشوں کے باعث یکم جولائی سے اب تک 109602افراد متاثر ہوئے ، 866 مکانات مکمل منہدم ہوئے اور 13808مکانات کو جزوی نقصان پہنچا۔ سیلاب سے 58789ایکڑ پر فصلیں اور 41 کلو میٹر سڑکیں متاثر ہوئیں۔ بارشوں کے باعث 7 پلوں کو نقصان پہنچا اور 346مویشی ہلاک ہوئے۔
رپورٹ میں یہ بھی بتایا گیا کہ مو سلا دھار بارشوں کے دوران جعفر آباد کے 3 اور لورالائی کا بیسک ہیلتھ یونٹ بھی بری طرح سے متاثرہوا ہے۔