پشاور میں بجلی کے بھاری بلوں کے خلاف خواجہ سرا بھی سڑکوں پر نکل آئے۔ خواجہ سراوں کا کہنا ہے کہ ایک پنکھے اورر ایک بلب کا ایک لاکھ روپے بل آیا ہے، حکومت ہمیں بجلی چوری پر مجبور کر رہی ہے۔

پشاور کے دلزاک روڈ پر خواجہ سراؤں نے بجلی بلوں میں اضافے کے خلاف احتجاجی مظاہرہ کیا۔

مظاہرین نے ہاتھوں میں بجلی کے بلز اٹھا رکھے تھے اور واپڈا کے خلاف شدید نعرہ بازی بھی کی۔ مظاہرین کا کہنا تھا کہ مہنگائی نے پہلے سے ہی ہمارا جینا محال کردیا، اب وہیں رہی سہی کسر بجلی بلوں میں ناروا ٹیکسوں نے پوری کردی۔

خواجہ سراؤں نے کہا کہ ایک پنکھے اور بلب کا ایک لاکھ سے زیادہ کا بل آیا ہے جو برادشت سے باہر ہے، خواجہ سراوں نے تالیاں بجا بجا کر کہا کہ حکومت بجلی کے اتنے بھاری بل بھیج کر ہمیں چوری پر مجبور کررہی ہے۔