ویب ڈیسک: جاپان کے وزیراعظم اور وزیر خزانہ کے خصوصی مشیر مساتو کانڈا ایشیائی ترقیاتی بینک (اے ڈی بی) کے نئے صدر منتخب ہوگئے ہیں، وہ 24 فروری 2025 کو اپنے عہدے کا چارج سنبھالیں گے۔
ایشیائی ترقیاتی بینک کے بورڈ آف گورنرز نے متفقہ طور پر مساتو کانڈا کو ادارے کا 11واں صدر منتخب کر لیا ہے۔
اے ڈی بی کے جاری کردہ اعلامیہ کے مطابق 59 سالہ مساتو کانڈا اس وقت جاپان کے وزیراعظم اور وزیر خزانہ کے خصوصی مشیر کے طور پر خدمات انجام دے رہے ہیں۔ وہ موجودہ صدر ماساتسوگو اساکاوا کی جگہ لیں گے جو 23 فروری 2025 کو اپنا عہدہ چھوڑ دیں گے۔
صدر اساکاوا کی مدت 23 نومبر 2026 کو پوری ہونی تھی لیکن ان کے قبل از وقت عہدہ چھوڑے کے سبب مساتو کانڈا 24 فروری 2025 کو اپنے عہدے کا چارج سنبھالیں گے۔
ایشیائی ترقیاتی بینک کے بورڈ آف گورنرز کے چیئرمین اور بینک آف اٹلی کے گورنر فابیئو پنیٹا نے کہا کہ ’’مسٹر کانڈا کا بین الاقوامی مالیاتی امور میں وسیع تجربہ اور کثیرالجہتی ماحول میں ان کی قائدانہ صلاحیتیں اے ڈی بی کو عالمی اقتصادی چیلنجز کے مقابلے اور بین الاقوامی تعاون کو فروغ دینے میں مدد فراہم کریں گی۔
مسٹر کانڈا کو مالیاتی پالیسی اور میکرو اکنامک حکمت عملی میں تقریباً چار دہائیوں کا تجربہ حاصل ہے۔ جاپان کی وزارت خزانہ میں وہ کئی اہم عہدوں پر فائز رہے جن میں نائب وزیر برائے بین الاقوامی امور اور ڈپٹی کمشنر برائے فنانشل سروسز ایجنسی شامل ہیں۔
وہ تعلیمی اور سائنسی پالیسیوں کے ماہر ہونے کے ساتھ ساتھ یونیورسٹی اصلاحات میں بھی پیش پیش رہے ہیں۔ مسٹر کانڈا نے جی 7، جی 20 اور دیگر بین الاقوامی فورمز میں فعال کردار ادا کیا، جہاں انہوں نے کثیرالجہتی ترقیاتی بینکوں کی اصلاحات، وبائی امراض سے بچاؤ، تیاری اور ردعمل، اور قرضوں کی شفافیت جیسے مسائل پر پالیسی چیلنجز کا سامنا کیا۔
ان کے دور میں جاپان نے ایشیائی ترقیاتی فنڈ کے 14ویں ریپلیشمنٹ میں ایک ارب ڈالر سے زائد کا ریکارڈ عطیہ دیا۔ 2016 سے مسٹر کانڈا آرگنائزیشن فار اکنامک کواپریشن اینڈ ڈویلپمنٹ (او سی سی ڈی) کی کارپوریٹ گورننس کمیٹی کے چیئرمین کے طور پر بھی خدمات انجام دے رہے ہیں، جہاں انہوں نے جی 20 اور او ای سی ڈی کے گورننس اصولوں پر نظر ثانی کی مسٹر کانڈا نے ٹوکیو یونیورسٹی سے 1987 میں قانون میں بیچلر کی ڈگری اور 1991 میں آکسفورڈ یونیورسٹی سے اکنامکس میں ایم فل کیا۔