سٹی42: پاکستان میٹرولوجیکل ڈیپارٹمنٹ نے پنجاب کے بیشتر علاقوں میں آج اور کل کے دوران آندھی چلنے اور راجن پور، ڈی جی خان کے علاقوں کہیں کہیں گرج چمک کے ساتھ بارش ہونے کی پیش گوئی کی ہے جبکہ خیبر پختونخواہ کے بالائی علاقوں اور کشمیر میں کہیں تیز بارش اور کہیں طوفانِ باد و باراں کی پیشینگوئی بھی کی ہے۔
میٹ ڈیپارٹمنٹ کا کہنا ہے کہ آج 28 مئی سے یکم جون 2024 کے دوران شدید ہیٹ ویو کے حالات کم ہونے کا امکان ہے۔
کشمیر، گلیات، گلگت بلتستان، بالائی پختونخوا
میٹ ڈیپارٹمنٹ کے مطابق ایک مغربی لہر 28 مئی 2024 سے پاکستان کے مغربی حصوں میں داخل ہونے کا امکان ہے۔ اس موسمی نظام کے زیر اثر کے پی، جی بی، گلیات، مری اور ریاست آزاد جموں و کشمیر میں گرج چمک کے ساتھ موسلادھار بارش ہونے کا امکان ہے۔ اس دوران سڑکیں درہم برہم ہو سکتی ہیں۔
سیاحوں کو مشورہ دیا گیاہے کہ وہ اس سپیل کے دوران محتاط رہیں اور سفر کرنے سے پہلےموسم کا جائزہ لے لیں۔
ان بارشوں سے بجلی اور دیگر یوٹیلٹی سروسز میں خلل بھی پڑ سکتا ہے۔موسلادھار بارش مقامی ندی نالوں اور ندیوں میں اچانک سیلاب پیدا کر سکتی ہے جبکہ لینڈ سلائیڈنگ، مٹی کے تودے، بالائی میں ممکنہ سڑک کی رکاوٹوں کا باعث بن سکتے ہیں۔
پنجاب
پنجاب کے بیشتر علاقوں میں آندھی اور کہیں کہیں ژالہ باری فصلوں اور کمزور تعمیرات کو نقصان پہنچا سکتی ہے۔ بعض علاقوں میں گرج چمک کے ساتھ بارش کے دوران بجلی گرنے کا خطرہ ہے۔رود کوہی کے علاقوں ڈی جی خان اور راجن پور میں پہاڑی طوفان متوقع ہیں۔ ان علاقوں میں موسلادھار بارش مقامی نالوں / ندی نالوں اور ندیوں میں اچانک سیلاب پیدا کر سکتی ہے۔
بلوچستان
بلوچستان میں وادیِ کوئٹہ اور ملحقہ اضلاع میں موسلادھار بارش مقامی نالوں میں سیلاب کا باعث بن سکتی ہے۔ سلیمان اور کیرتھر کے پہاڑی سلسلے میں پہاڑی طوفان متوقع ہیں۔ لینڈ سلائیڈنگ / مٹی کے تودے سڑکوں پر ممکنہ رکاوٹوں کا باعث بن سکتے ہیں۔ آندھی / ژالہ باری فصلوں، ڈھیلے ڈھانچے وغیرہ کو نقصان پہنچا سکتی ہے۔