(سٹی42)74لاکھ کی آدھا کلو مٹھائی،مغلپورہ کے رہائشی کے گھر میں ڈاکو بیٹے کی پیدائش پر مٹھائی کا ڈبہ لے کر آئے اور گھر سے 74 لاکھ روپے سے زائد مالیت کے زیورات اور نقدی لوٹ کر فرار ہو گئے۔
تفصیلات کے مطابق مغلپورہ کے رہائشی کو بیٹے کی پیدائش پر مٹھائی مہنگی پڑ گئی، پولیس کے مطابق حاجی اکمل کے گھر میں ڈاکو مٹھائی دینے کے بہانے داخل ہوئے ،گھر میں داخل ہوتے ہی مٹھائی کے ڈبے سے پستول نکال کر تان لیا اور اہل خانہ کو یرغمال بنا کر لوٹ مار شروع کر دی، پولیس کے مطابق ڈاکو گھر سے 57 تولے سونا اور دس لاکھ نقدی لوٹ کر فرار ہوئے ۔
پولیس کے مطابق مٹھائی کے ڈبے میں ڈاکووں نے پستول رکھا ہوا تھا، اہل خانہ کو یرغمال بنا کر واردات کی گئی ،پولیس نے موقع پر پہنچ کر کارروائی کا آغاز کر دیا ،موقع پر لگے سی سی ٹی وی کیمروں کی مدد بھی حاصل کر لی گئی ہے۔
دوسری جانب شادباغ کے علاقے وسن پورہ میں ڈاکووں نے شہری حاجی فیصل اور اسکے اہلخانہ سے لوٹ مار کی،موٹرسائیکل سوار ڈاکو فیصل اور اسکے اہلخانہ سے چھ لاکھ مالیت کے زیورات،نقدی اور موبائل لوٹ کر فرار ہو گئے،واردات کی سی سی ٹی وی فوٹیج سٹی 42 کو موصول ہوگئی،فوٹیج میں ڈاکو پہلے گلی کا چکر لگا کر اطراف کا جائزہ لیتے ہیں اور پھر موقع ملتے ہی لوٹ مار کی اور فرار ہو گئے۔
موصول ہونے والے فوٹیج میں ڈاکووں کو لوٹ مار کر کے فرار ہوتے دیکھا جا سکتا ہے،شہری حاجی فیصل کا کہنا ہے کہ پولیس نے مقدمہ درج کر لیا لیکن سی سی ٹی وی کے باوجود ڈاکو پولیس کی گرفت میں نہیں آ سکے۔