ویب ڈیسک: ماضی کی معروف پاکستانی اداکارہ صاحبہ کی زندگی میں پہلی بار اپنے بوڑھے والد سے ملاقات کی جذباتی ویڈیو سوشل میڈیا پر وائرل ہوگئی۔
صاحبہ نے 11 مارچ کو اپنے سگے والد سے زندگی میں پہلی بار ملاقات کی ہے۔ ویڈیو میں دیکھا جاسکتا ہے کہ صاحبہ جذباتی ہوتے ہوئے اپنے والد سے پوچھتی ہیں کہ میرا کیا قصور تھا جو آپ نے کبھی مجھ سے ملاقات کرنے کی کوشش بھی نہیں کی اور پیدائش کے وقت میرا چہرہ تک نہیں دیکھا۔
اداکارہ کا اپنے والد سے کہنا تھا کہ کیا آپ کو میری پیدائش کی خوشی نہیں تھی؟ آپ کے یہاں اولاد پیدا ہوئی تھی، آپ کیوں مجھے دیکھنا نہیں چاہتے تھے؟ جس پر جواب دتیے ہوئے صاحبہ کے والد نے کہا کہ مجھے معاف کردو، میں تمہاری طرف دیکھ کر بھی بات نہیں کرسکتا کیونکہ مجھے اپنی غلطی پر غصہ آتا ہے، میں بہت بوڑھا ہوچکا ہوں، اب ٹھیک سے چل بھی نہیں سکتا، اللہ نے مجھے تم سے ملوانا تھا، اسی لیے میری سانسیں بچا کر رکھیں۔
اداکارہ کا والد کا کہنا تھا کہ تمہاری پیدائش سے پہلے ہی تمہاری والدہ سے علیحدگی ہوچکی تھی اور جب تمہاری پیدائش ہوئی تو کسی نے مجھے گھر میں داخل تک نہیں ہونے دیا، اسی وجہ سے پیدائش کے وقت تُم سے مل نہیں سکا۔
اُن کا مزید کہنا تھا کہ میں بہت خوش ہوں کہ اللہ نے تمہیں ریمبو جیسا شوہر نصیب کیا جو تم سے بےانتہا محبت کرتا ہے اور خوبصورت بچوں کی نعمت سے نوازا۔
صاحبہ نے اپنے آفیشل انسٹاگرام اکاؤنٹ پر والد کے ہمراہ لی گئیں چند تصاویر بھی پوسٹ کیں جن میں اُنہوں نے والد کے کندھے پر سر رکھا ہوا ہے۔ جہاں اداکارہ نے اپنی پوسٹ میں بتایا کہ اُنہوں نے زندگی میں پہلی بار اپنے والد سے ملاقات کی ہے اور اُنہیں دیکھا ہے۔
واضح رہے کہ گزشتہ ماہ ایک انٹرویو کے دوران صاحبہ نے انکشاف کیا تھا کہ اُنہوں نے کبھی اپنے سگے والد کو نہیں دیکھا اور نہ ہی کبھی اُن سے ملاقات ہوئی کیونکہ اداکارہ کی پیدائش سے پہلے ہی اُن کے والدین کے درمیان علیحدگی ہوگئی تھی۔
صاحبہ کا کہنا تھا کہ اُن کی پیدائش کے بعد بھی والد نے کبھی اُن سے ملنے کی کوشش نہیں کی، اسی وجہ سے اُن کے دل میں کبھی اپنے سگے والد کے لیے باپ والے جذبات نہیں آئے۔