ویب ڈیسک: کنئرڈ کالج برائے خواتین لاہور میں “ہمقدم” ایپ کا باقاعدہ اجراء ہو گیا۔ یہ اجراء خواتین کے حقوق کے لیے کام کرنے والی تنظیم شرکت گاہ اور کنئرڈ کالج سے تعلیم یافتہ طالبات کی انجمن “اوکس” کے تعاون سے کیا گیا۔ یہ ایپ پاکستان بھر میں جنسی تشدد کا شکار خواتین کی دادرسی کے لیے رہنما ثابت ہو گی۔

اس تقریبِ اجراء میں شرکت گاہ کی نمائندہ حمیرا ممتاز شیخ اور ثنا رضا نے تعارفی مقالے پیش کیے۔ انہوں نے بتایا کہ لمز یونیورسٹی میں قائم ٹی پی آئی کے تعاون سے اس ایپ کی تشکیل عمل میں آئی ۔ اس ایپ کے ذریعے متاثرہ خواتین کو ہر طرح کی رہنمائی میسر ہوگی جس میں قانونی چارہ جوئی کے بارے میں معلومات، نفسیاتی اور جذباتی تعاون اور ہنگامی مدد شامل ہیں۔ یہ ایپ ملک کے مختلف اضلاع میں دستیاب ہے جس کے ذریعے ان علاقوں کی خواتین بھی جنسی تشدد سے بچاؤ کے لیے امداد حاصل کر سکتی ہیں۔اوکس کی سربراہ آمنہ عمر نے اس ایپ کی افادیت پر روشنی ڈالی۔