ویب ڈیسک: سینٹرل کنٹریکٹ کے معاملے پر پی سی بی کا کرکٹرز کے ساتھ تاریخی معاہدے پر اتفاق ہوگیا۔

 پی سی بی اور کھلاڑیوں کے درمیان سینٹرل کنٹریکٹ پر کئی ماہ سے تنازع چل رہا تھا، اسی وجہ سے چار ماہ سے کوئی ادائیگی بھی نہیں ہوئی، چیئرمین مینجمنٹ کمیٹی ذکاء اشرف نے شعبہ انٹرنیشنل کرکٹ کی ناکامی کے بعد معاملہ اپنے ہاتھ میں لیا، انھوں نے چیف سلیکٹر انضمام الحق کو کھلاڑیوں سے مذاکرات کا ٹاسک سونپا، انضمام اور اسٹار کرکٹرز کے ایجنٹ ایک ہی ہیں، اس سے انھیں مسئلہ حل کرنے میں مدد ملی، وہ اپنے ساتھ بابر اعظم کو بھی گذشتہ دنوں ذکاء اشرف کے گھر لے کر گئے جہاں کپتان نے کھلاڑیوں کے مطالبات سے آگاہ کیا، انھوں نے آسٹریلیا اور بھارت کی طرح پاکستانی کرکٹرز کو بھی بورڈ کی آمدنی میں سے حصہ دینے کی بات کہی۔

 ذکاء اشرف نے ساتھیوں سے مشاورت کے بعد فیصلے کرنے کا جواب دیا، گذشتہ روز پھر اس حوالے سے اہم میٹنگ ہوئی، اس میں طے پایا کہ بورڈ کی کئی ارب روپے کی آمدنی سے 3 فیصد حصہ کرکٹرز کو دیا جائے گا، یہ رقم بھی کروڑوں بنے گی۔

 اے کیٹیگری کرکٹرز بابر اعظم، شاہین شاہ آفریدی اور محمد رضوان کو ماہانہ 45 لاکھ روپے دیے جائیں گے، بی کو 30 لاکھ ملیں گے، دیگر 2 کیٹیگریز کے لیے15 سے ساڑھے 7 لاکھ روپے ماہانہ رکھے گئے ہیں۔

???? Pakistan Men's Central Contract list ????

As many as 25 cricketers have been offered a central contract ????

Read more ➡️ https://t.co/6pNAexQEds pic.twitter.com/bgkvopQ6gl

— Pakistan Cricket (@TheRealPCB) September 27, 2023

کرکٹرز نے ٹیکس کے حوالے سے بات کی تو بورڈ نے10 فیصد کٹوتی کا بتایا، جواب میں انھیں آگاہ کیا گیا کہ حقیقت میں تو 35 سے 50 فیصد رقم منہا ہوتی ہے، اس حوالے سے مزید غور کرنے کا فیصلہ ہوا، کھلاڑیوں نے معاہدوں پر اصولی اتفاق کرتے ہوئے مزید مطالعہ کرنے کے بعد دستخط کا یقین دلا دیا۔ منگل اور بدھ کی درمیانی شب ٹیم کی روانگی سے قبل دستخط کی توقع تھی۔

 یاد رہے کہ چار ماہ تک کھلاڑیوں نے خاموش احتجاج کیا لیکن پھر میچ شرٹ پر کمرشل لوگو لگانے سے انکار اور ورلڈ کپ میں آئی سی سی کی تشہیری سرگرمیوں میں بھی عدم شرکت کا عندیہ دیا تھا، البتہ اب ایک بڑا بحران حل ہوگیا ہے، بھارت میں ورلڈ کپ کے دوران  کھلاڑی بھی مکمل توجہ کھیل پر ہی دے سکیں گے۔

 کپتان بابراعظم کا اس حوالے سے کہنا ہے کہ یہ ایک تاریخی ڈیل ہے جس سے وہ خوش اور مطمئن ہیں۔ یہ ایک  چیلنجنگ اور طویل عمل تھا لیکن ہم ایک صاف اور فائدہ مند معاہدے پر پہنچنے میں کامیاب رہے ہیں۔ یہ معاہدہ کھلاڑیوں کے کریئر اور پاکستان کرکٹ کیلئے ایک نیا باب ہوگا۔ انہوں نے پاکستان کرکٹ بورڈ کی منیجمنٹ کمیٹی کے چیرمین ذکاء اشرف کا خاص طور پر شکریہ ادا کیا کہ انہوں نے اس معاملے میں ذاتی دلچسپی لی ان کی یہ دلچسپی پاکستان کرکٹ کیلئے بڑی اہمیت کی حامل ہیں۔

 پاکستان کرکٹ بورڈ کے ڈائریکٹر انٹرنیشنل عثمان واہلہ کا کہنا ہے کہ ہم  نے نہ صرف ایک تاریخی سینٹرل کنٹریکٹ پر دستخط  کیے ہیں بلکہ یہ کھلاڑیوں کی اہمیت کو تسلیم کیے جانے کے ضمن میں ایک اہم قدم بھی ہے اور یہ ٹیم ورک کا نتیجہ ہے۔