سٹی 42 : پنجاب کی وزیر اعلیٰ مریم نواز کی زیرصدارت صوبائی کابینہ کے اجلاس میں درجنوں اہم کاموں کی منظوری دی گئی، جن میں مرغی کے گوشت کی قیمت کم کروانے کیلئے پولٹری مالکان کیخلاف سخت اقدامات کرنے کی ہدایت کی گئی۔
پنجاب کی وزیر اعلیٰ مریم نواز کی زیر صدارت صوبائی کابینہ کا 24واں اجلاس ہوا، جس میں پنجاب میں سپیشل افراد، بزرگ اور طلبہ کے لئے مفت سفر کی سہولت کی منظوری دی گئی۔ اجلاس میں طلبہ کے لئے ٹرانسپورٹ کارڈ جاری کرنے کی تجویز کا جائزہ لیا گیا۔
وزیراعلیٰ مریم نواز نے چکن کے نرخ کم کرنے کے لئے موثر اقدامات کی ہدایت کی۔ اجلاس میں جنسی جرائم کیلئے سپیشل انوسٹی گیشن یونٹس کے قیام کی منظوری دی گئی، مریم نواز نے ریپ کے واقعات کی روک تھام کے لئے اقدامات یقینی بنانے کی ہدایت کی۔
اجلاس میں بھکر اور بہاولنگر میں ایئرپورٹ بنانے کا اصولی فیصلہ کیا گیا، ضلع بھکر میں ایئر ایمبولینس سروس کے لیے ایئر اسٹرپ کی تعمیر کے فنڈز کی منظوری دی گئی، اور پنجاب کی ایئر لائن سروس کے آغاز کی تجویز کا جائزہ لیا گیا ۔
وزیراعلیٰ مریم نواز نے ٹریفک چالان اور جرمانے کی وصولی یقینی بنانے کا حکم دیا، اور ٹریفک چالان جرمانے کی عدم ادائیگی پر زیروٹالرنس پالیسی اپنانے کی ہدایت کی۔ اس کے علاوہ وزیراعلیٰ مریم نواز نے لیگل ریفامز کے لئے پلان طلب کرلیا۔ اجلاس میں کابینہ نے نئے ایڈووکیٹ جنرل امجد پرویز کی تعیناتی کا خیر مقدم کیا۔
مریم نواز نے اجلاس سے گفتگو میں کہا کہ حکومت آتے ہی سفارشوں کی لائن لگ گئی لیکن کسی بھی سفارش پر عمل نہیں کیا، لاء آفیسرز کی 100فیصد میرٹ پر تعیناتی ہونی چاہیے، بھرتی پر انگلی نہیں اٹھنی چاہیے۔ انہوں نے کہا کہ زیادتی کے واقعات کا سن کر سرشرم سے جھک جاتا ہے۔
وزیراعلیٰ مریم نواز نے کہا کہ پنک سالٹ پاکستان کا ہے صرف پیکجنگ کرکے فائدہ دوسرے ممالک اٹھارہے ہیں۔ انہوں نے کہاکہ اللہ تعالیٰ کا شکر ہے کہ شہریوں نے نگہبان رمضان پر نہایت مثبت رسپانس دیا ہے۔ 25لاکھ 64ہزار گھرانوں کو نگہبان رمضان2025 ء کے چیک مل چکے ہیں۔ خوشی ہوئی کہ وفاق اور دیگر صوبوں نے پنجاب کے رمضان پیکج کو فالو کیا۔
مریم نواز نے کہا کہ پہلی بار رمضان میں قیمتیں کنٹرول میں رہیں، لائنز نہیں لگی اوردھکم پیل نہیں ہوئی، 15سال میں سب سے سستا رمضان بازار لگانے پر سلمیٰ بٹ اورپوری ٹیم کو شاباش دیتی ہوں۔ انہوں نے کہا کہ جلد 1.5 ملین گھرانوں کو راشن کارڈ دینے جارہے ہیں۔ وزیراعلیٰ مریم نواز نے عیدالفطر پراشیائے خوردنوش کے نرخ پر کنٹرول رکھنے کی ہدایت کی۔
صوبائی کابینہ نے 40ہزار سپیشل طلبہ کو وزیراعلیٰ مریم نواز کی طرف سے عید گفٹ دینے پر خراج تحسین پیش کیا ۔ اس موقع پر طلبہ کے لئے گریڈ نگ سسٹم کے لئے ورلڈ بینک سے معاہدہ سائن کرنے کی منظوری بھی دی گئی ۔
اجلاس میں پنجاب فرٹیلائزر کنٹرول ایکٹ کی خلاف ورزی پر جرمانے بڑھا دیئے گئے، ناجائزہ اسلحہ کے تدارک کے لئے پنجاب آرمز آرڈیننس کی خلاف ورزی پر جرمانے اور سزا مزید سخت کردی گئی۔ اس کے علاوہ پیدائش اور ڈیٹھ رجسٹریشن سرٹیفکیٹ کی فیس ایک سال کے لئے معاف کر دی گئی۔
اجلاس میں نادار اور مستحق افراد کو مفت قانونی امداد یقینی بنانے کے لئے پنجاب لیگل ایڈ رولز میں ترمیم کی منظوری دی گئی۔ وزیراعلیٰ مریم نواز نے پنجاب میں چاول کی دو فصلیں کاشت کرنے کی پابندی کی تجویز کو مسترد کر دیا۔
اجلاس میں 664 بصارت سے محروم افراد (VIPs) کو ڈیلی ویجز پر ایڈجسٹ کرنے کی منظوری دی گئی، بصارت سے محروم افراد (VIPs) کی مزید سماجی شمولیت کے لئے تجاویز کی بھی منظوری دے دی گئی ۔ اس کے علاوہ پنجاب کرائم کنٹرول ڈیپارٹمنٹ میں 3904 آسامیوں کے قیام کی منظوری دی گئی ۔
اجلاس میں شیخ زید میڈیکل کالج/ہسپتال، رحیم یار خان کے نئے کارڈیک سینٹر کے لئے ایڈہاک/کنٹریکٹ بنیادوں پر بھرتیوں کی اجازت کی منظوری دی گئی۔ پنجاب لائف انشورنس کمپنی (PLIC) میں کلیدی عہدوں پر بھرتی کے لئے سلیکشن کمیٹی کی منظوری دی گئی۔اس کے علاوہ محکمہ خزانہ کے سپیشلائزڈ یونٹ میں خالی آسامیوں پر نئی بھرتیوں کی بھی منظوری دے دی گئی۔
اجلاس میں نواز شریف سینٹر آف ایکسی لینس فار ارلی چائلڈ ایجوکیشن، چلڈرن لائبریری کمپلیکس لاہور کے لئے 32 نئی آسامیوں کے قیام کی منظوری دی گئی۔ فسادات سے نمٹنے کے لئے 2ہزار نفری پر مشتمل رائٹ مینجمنٹ (Riot Management) پولیس کے قیام کی منظوری، کرائم کنٹرول ڈیپارٹمنٹ کے قیام کی منظوری بھی دے دی گئی۔