ویب ڈیسک : پاکستان کے انٹرنیشنل باکسر  عثمان وزیر نے اپنی 13ویں انٹرنیشل فائٹ جیت لی ۔ 

 بنکاک تھائی لینڈ میں کھیلی گئی فائٹ میں عثمان وزیر کا مقابلہ تھائی حریف جتسدا سگمانتسک سے تھا، عثمان وزیر نے تھائی باکسر کو تیسرے راونڈ میں ناک آوٹ کردیا۔ عثمان وزیر اپنی تمام  13انٹرنیشنل  فائٹس جیت کر اب تک ناقابل شکست ہیں۔ عثمان وزیر ورلڈ یوتھ ٹائٹل،ایشین ٹائٹل اور مڈل ایسٹ ٹائٹل جیت چکےہیں۔ 

 عثمان وزیر  کا کہنا ہے کہ ایشین ٹائٹل، مڈل ایسٹ  اور ورلڈیوتھ ٹائٹل بھی جیت کر پاکستان اور گلگت بلتستان کا نام روشن کیا،آج تک کوئی پاکستانی باکسر یہ ٹائٹل نہیں جیت سکا۔ مجھے 13ویں فائٹ میں اپنے ورلڈ یوتھ ٹائٹل کا دفاع کرنا تھا، فنڈز کی عدم دستیابی کی وجہ سے میں ٹائٹل فائٹ کی فیس جمع نہیں کروا سکا ۔ فائٹ جیتنے کی خوشی ہے لیکن وعدہ کے باوجود حکومت کی سپورٹ نہ ملنے کا افسوس بھی ہے، حکومتی سپورٹ نا ملنے کی وجہ سے میرا ورلڈ یوتھ ٹائٹل بغیر لڑے واپس لے لیا گیا۔ نو سال کی مسلسل محنت اور اپنی مدد آپ کے تحت یہ ٹائٹل پاکستان کے لیے جیتا تھا۔