سٹی 42 : وفاقی وزیر خزانہ سینیٹر محمد اورنگزیب سےاقوام متحدہ کے ترقیاتی پروگرام کے پاکستان میں رہائشی نمائندے ڈاکٹر سیموئیل رزق کی ملاقات ہوئی ۔ 

ملاقات میں یو این ڈی پی کے جاری منصوبوں اور پاکستان میں عوامی و نجی شعبوں کے ساتھ تعاون پر تبادلہ خیال کیا گیا۔ ڈاکٹر سیموئیل رزق نے یو این ڈی پی کی مختلف شعبوں میں جاری سرگرمیوں کا جائزہ پیش کیا، جن میں سماجی ترقی، موسمیاتی لچک، توانائی کی منتقلی، ڈیجیٹل تبدیلی، اور عوامی شعبے میں کارکردگی کی بہتری شامل ہیں۔ 

 وزارت خزانہ کے مطابق منصوبوں کا مقصد پائیدار ترقی کو فروغ دینا، پاکستان کی موسمیاتی تبدیلیوں کے خلاف مزاحمت کو مضبوط بنانا، اور طویل مدتی سماجی و اقتصادی ترقی کو یقینی بنانا ہے۔ 

سینیٹر محمد اورنگزیب نے ان اقدامات کی اہمیت کو تسلیم کرتے ہوئے بین الاقوامی معیار کے مطابق منصوبوں کی منصوبہ بندی، نگرانی، اور شفاف رپورٹنگ پر زور دیا، انہوں نے ترجیحی شعبوں میں یو این ڈی پی کی تکنیکی اور مالی مدد کو بھی سراہا ۔ 

وزیر خزانہ نے حکومت کی شمولیتی اور پائیدار ترقی کے لیے عزم کا اعادہ کیا  ۔ انہوں نے آبادی میں اضافہ، غذائی قلت، اور موسمیاتی تبدیلی جیسے اہم چیلنجز کو حکومتی حکمت عملی کا مرکز قرار دیا ۔ سینیٹر اورنگزیب نے پاکستان اور ورلڈ بینک کے درمیان حال ہی میں طے پانے والے 10 سالہ شراکت داری پروگرام کا ذکر کیا، جس کا مقصد انسانی سرمائے کی ترقی، نجی شعبے کی مضبوطی، اور اقتصادی، سماجی، اور ماحولیاتی استحکام کو فروغ دینا ہے ۔ 

دونوں فریقین نے پاکستان کو درپیش ترقیاتی چیلنجز، بالخصوص موسمیاتی تبدیلی، سماجی ترقی، اور عوامی شعبے کی کارکردگی میں بہتری کے لیے تعاون جاری رکھنے کے عزم کا اعادہ کیا ۔