ویب ڈیسک:آسٹریلیا کے خلاف باکسنگ ڈے ٹیسٹ کے پہلے روز بھارتی کرکٹ ٹیم کے اسٹار بیٹر ویرات کوہلی ڈیبیو کرنے والے آسٹریلوی اوپنر سیم کونسٹاس کو کندھا مارنے کے بعد سوشل میڈیا صارفین یہاں تک مداحوں کے نظروں میں بھی اپنا معیار کھو بیٹھے۔

بھارتی ٹیم کے سابق کپتان ویرات کوہلی کو آسٹریلوی اوپنر سیم کونسٹاس کے ساتھ الجھنا مہنگا پڑا جس کے بعد آئی سی سی نے ویرات کوہلی کو میچ فیس کا 20 فیصد جرمانہ عائد کرتے ہوئے ایک ڈی میرٹ پوائنٹ بھی دے دیا،ویرات کوہلی کا شمار ایک تجربہ کار اور سینئر کھلاڑیوں میں ہوتا ہے مگر کم عمر آسٹریلیوی اوپنر کے ساتھ اس طرح کا رویہ انہی پر بھاری پڑ گیا۔

چوتھے ٹیسٹ کے پہلے روز سیم کونسٹاس نے بھارتی بولر جسپریت بمراہ کے خلاف غیر معمولی شاٹس کھیلے جس پر سیم کونسٹاس کے اعتماد اور توجہ کو ہٹانے کے لیے ویرات کوہلی نے جملے کسنے شروع کر دیے تھے۔

میچ کے 10ویں اوور کے اختتام پر ویرات کوہلی اور سیم کونسٹاس کے آپس میں کندھے ٹکرا گئے جس پر دونوں کے درمیان تکرار ہوئی تاہم عثمان خواجہ اور امپائرز نے بیچ بچاؤ کروا دیا۔

دوسری جانب آسٹریلوی اخبار کی جانب سے ویرات کوہلی کی تصویر شائع کرتے ہوئے انہیں مسخرہ بنا کر پیش کیا گیا ہے جس سے بھارتی میڈیا آگ بگولہ ہو گیا ہے،اخبار ’دی ویسٹ آسٹریلوی‘ نے سرخی میں سابق بھارتی کپتان ویرات کوہلی کی تصویر چھاپی جس پر کلاؤن کوہلی لکھا تھا۔