طیب سیف: ایف آئی اے انٹرپول پاکستان نے بڑی کارروائی کے دوران قتل کے مقدمے میں مطلوب 3 اشتہاری ملزمان یو اے ای سے گرفتار کرلیے۔
ترجمان ایف آئی اے کے مطابق سنگین جرائم میں مطلوب 3 اشتہاری ملزمان یو اے ای سے گرفتار کیے گئے، اشتہاری ملزمان کو یو اے ای سے گرفتار کر کے لاہور ائرپورٹ منتقل کر دیا گیا، گرفتار ملزمان میں ذیشان یوسف، ہدایت اللہ اور محمد اکرم شامل ہیں، ملزمان پنجاب پولیس کو مطلوب تھے۔ ملزمان کے خلاف قتل کی دفعات کے تحت مقدمات درج تھے۔ ایف آئی اے NCB انٹرپول پاکستان نے ملزمان کی گرفتاری کے لئے ریڈ نوٹسسز جاری کئے تھے۔
ملزم ذیشان یوسف بہاولپور پولیس، ملزم ہدایت اللہ رحیم یار خان پولیس جبکہ ملزم محمد اکرم لاہور پولیس کو مطلوب تھے، ملزمان کے خلاف سال 2017, 2021 اور 2023 میں مقدمے درج ہوئے تھے۔
بعد ازاں ایف آئی اے امیگریشن لاہور نے ملزمان کو متعلقہ پولیس حکام کے حوالے کر دیا۔