(زین مدنی )” میرے پاس تم ہو“ میں خواتین کو منفی انداز میں پیش کیا گیا ‘ نامور اداکارہ سونیا حسین نے مقبول ڈرامہ میرے پاس تم ہو کی پیشکش کو ٹھکرانے کی وجہ بتا دی۔
میڈیا سے بات چیت کرتے ہوئے سونیا حسین نے بتایا کہ ڈراما سیریل میرے پاس تم ہو میں پہلے مہوش کے کردار کے لیے انہیں پیشکش کی گئی تھی لیکن انہیں اس کردار کے حوالے سے کچھ تحفظات تھے لہذا انہوں نے انکارکردیا۔ سونیا نے مہوش کے کردار کے حوالے سے بتایا کہ اس کردارکے ذریعے خواتین کو منفی اندازمیں پیش کیا گیا ہے۔ ہمارے معاشرے میں پہلے ہی عورتوں کی غلط تصویر ییش کی جاتی ہے اور میں خواتین کو برا نہیں دیکھ سکتی ۔ یہی وجہ ہے کہ مہوش کے منفی کردار کی وجہ سے ڈرامہ کی پیشکش ٹھکرا دی۔
سونیا حسین نے بتایاکہ ڈرامے کی مقبولیت کو دیکھتے ہوئے انہیں کبھی اس بات پرافسوس نہیں ہوا کہ انہوں نے ڈراما ٹھکرادیا کیونکہ انہوں نے بہت سوچ سمجھ کرفیصلہ لیا تھا۔ تاہم سونیا نے عائزہ خان کی تعریف کرتے ہوئے کہا کہ عائزہ نے اس کردار کو بہت خوبی سے نبھایا ہے۔