سٹی42 : ملک کے مختلف علاقوں میں شدید دھند کے باعث موٹروے کی متعدد شاہراہوں کو ٹریفک کے لیے بند کر دیا گیا ہے۔

 موٹروے پولیس نے دھند کے باعث موٹروے ایم 4 شور کوٹ سے ملتان اور موٹروے ایم 5 ملتان سے روہڑی تک بند ہونے کی اطلاع دی ہے۔

 ترجمان موٹروے پولیس سید عمران احمد کے مطابق موٹرویز کو عوام کی حفاظت اور محفوظ سفر یقینی بنانے کے لیے بند کیا گیا ہے۔

ترجمان نے مزید کہا کہ شہریوں کو دن کے اوقات میں سفر کرنے کی ترغیب دی جاتی ہے۔ صبح 10 سے شام 6 بجے تک دھند کے موسم میں سفر کے لیے بہترین اوقات ہیں۔

موٹروے پولیس نے ڈرائیور حضرات کو آگے اور پیچھے دھند والی لائٹس کا استعمال کرنے کی ہدایت دی ہے تاکہ سفر میں احتیاط رکھی جا سکے۔ اُن کا کہنا ہے کہ  شہری غیر ضروری سفر سے گریز کریں، تیز رفتاری سے پرہیز کریں اور اگلی گاڑی سے مناسب فاصلہ رکھیں۔

مزید معلومات اور مدد کے لیے ہیلپ لائن 130 سے رابطہ کرنے کی درخواست کی گئی ہے۔