(زین مدنی حسینی) کورونا وائرس کا ممکنہ پھیلاؤ اور موجودہ لاک ڈاؤن کی صورتحال کے باعث لالی وڈ انڈسٹری کی فلم ٹچ بٹن عید الفطر پر ریلیزہونے سے رہ گئی ، فلم کو اب عید الاضحیٰ پر ریلیز کیا جائے گا۔
کورونا وائرس نے جہاں پوری دنیا کو اپنی لپیٹ میں لے رکھا ہے وہیں انٹرٹینمینٹ انڈسٹری سب سے زیادہ متاثر ہوئی ہے ۔ جہاں ہالی وڈ، بالی وڈ کی فلمیں روک دی گئیں ہیں وہیں پاکستانی فلم انڈسٹری کی عید الفطر پر ریلیز ہونے والی کامیڈی رومانٹک فلم ٹچ بٹن کی نمائش بھی روک دی گئی ہے ۔

فلم کی کاسٹ میں اداکار فرحان سعید ،فیروزخان، اور ایمان علی سمیت دیگر فنکار شامل ہیں ۔فلم کے ہدایتکار قاسم علی مرید نے سٹی فورٹی ٹو کو بتایا کہ اب فلم کو عید الاضحیٰ پر ریلیز کیا جائے گا۔ قاسم علی مرید کا کہنا ہے کہ اگر عید الاضحیٰ پر بھی حالات ایسے ہی رہے تو پھر فیصلہ کیا جائے گا کہ فلم کو کہاں اور کیسے ریلیز کرنا ہے۔

ایکشن اور رومانس سے بھرپور فلم ’’ٹچ بٹن‘‘ میں گلوکارواداکار فرحان سعید، ایمان علی، فیروز خان اورسونیا حسین مرکزی کردار اداکررہے ہیں۔ جب کہ اس فلم کے ذریعے اداکارہ عروہ حسین پروڈکشن کی دنیا میں قدم رہی ہیں اس کے علاوہ یہ ان کے شوہر فرحان کی بھی پہلی فلم ہے۔ اس فلم کے ذریعے فرحان سعید فلموں میں ڈیبیو کررہے ہیں۔

واضح رہے فلم میں   پنجابی کلچر کو دکھایا گیا ہے جب کہ فلم کے کئی سینز ترکی میں بھی فلمائے گئے ہیں جنہیں ٹیزر میں بھی شامل کیا گیا ہے۔

فلم کی پروڈیوسر عروہ حسین کے مطابق ان کی فلم کی کہانی محبت اور دوستی کے گرد گھومتی ہے جب کہ اسے پنجاب کے گاؤں اور ترکی میں فلمایاگیا ہے۔ فلم کی ہدایات قاسم علی مرید نے دی ہیں ۔فلم رواں سال عید الفطر کے موقع پر ریلیز کی جانی تھی تاہم اب کورونا وائرس کے باعث روک دی گئی ہے۔