سعدیہ خان: لاہور کے علاقے باغبانپورہ میں اوباش کی خاتون سےدست درازی کی کوشش، ملزم وقاص نے محلےدارخاتون سےدست درازی کی کوشش کی۔
تفصیلات کے مطابق باغبان پورہ میں ملزم وقاص نے محلےدار خاتون سے دست درازی کی کوشش کی۔ خاتون کے روکنے پر لڑکے نے دھمکیاں دیں اور مذاق بھی اڑاتا رہا۔ خاتون کےاہلخانہ نے تھانہ باغبانپورہ میں ملزم کیخلاف درخواست دے دی ہے۔لیکن پولیس نے درخواست کے باوجود کوئی کارروائی نہیں کی۔
واضح رہے گزشتہ روز گڑھی شاہو کے علاقہ میو گارڈن کے باہر گود میں بچہ اٹھائے خاتون کو ہراساں کرنے کی ویڈیو منظر عام پر آ ئی تھی۔ نامعلوم راہ گیر خاتون کو موٹر سائیکل سوار ملزم ہراساں کرتا دکھائی دیتا ہے، جو بار بار خاتون کو موٹر سائیکل پر بیٹھنے کی دعوت دیتا ہے۔ اوباش نوجوان سے تنگ آکر خاتون رکشہ میں سوار ہو جاتی ہے۔
ویڈیو وائرل ہونے پر سی سی پی او غلام محمود ڈوگر نے واقعہ کا نوٹس لیتے ہوئے ایس پی سول لائنز کو ملزم کی جلد گرفتاری کا حکم دیا تھا۔ گڑھی شاہو پولیس نے نامعلوم موٹر سائیکل سوار ملزم کے خلاف مقدمہ درج کر لیا، مقدمہ سب انسپکٹر ذبیر احمد سندھو کی مدعیت میں درج کیا گیا۔ نامعلوم ملزم نے میو گارڈن کے قریب راہ گیر خاتون کو ہراساں کیا تھا۔