مانیٹرنگ ڈیسک: ٹیک جائنٹ مائیکرو سافٹ نے 6 سال بعد نیا آپریٹنگ سسٹم ونڈوز الیون (Windows 11) متعارف کروادیا۔
تفصیلات کے مطابق  ٹیکنالوجی  کی دنیا میں کئی مہینوں سے مائیکروسافٹ کی ان تبدیلیوں کے بارے میں قیاس آرائیا ں  کی جارہی  تھیں تاہم اب مائیکرو سافٹ نے اپنے صارفین کے لیے ایک حیران کن آپریٹنگ سسٹم ونڈوز الیون پیش کردیا ہے۔ یہ کمپنی کی جانب سے اس کے ونڈوز آپریٹنگ سسٹم کا تازہ ترین ورژن ہے۔ اس نئے ورژن میں کمپنی نے زیادہ توجہ ونڈو استعمال کرنے والوں کے لیے انٹر فیس بذریعہ مکمل تبدیل شدہ لے آؤٹ ڈیزائن پر دیا ہے۔ یعنی اسے "ازسر نو" ڈیزائن  کیا گیا ہے، جس کے نتیجے میں اس کی کارکردگی میں بہتری لائی گئی ہے۔

ونڈوز میں لائی جانے والی ویژول تبدیلیوں کو سن ویلی کا کوڈ نام دیا گیا ہے۔ یہ واضح نہیں کہ ویژول تبدیلیاں نئے آپریٹنگ سسٹم کے ساتھ ہی ریلیز ہوں گی یا اسے الگ سے متعارف کروایا جائے گا۔ اس میں ایک مکمل نیا اسٹارٹ مینیو، ونڈوز اسٹور اور ریفریشنگ ڈیزائن شامل کیا گیا ہے۔ اس کا یوزرانٹرفیس ونڈوز 10 ایکس سے مشابہت رکھتا ہے جس کو پہلے ڈوئل اسکرین ڈیوائسز کے لیے متعارف کرائے جانے کی منصوبہ بندی کی گئی تھی مگر پھر اسے منسوخ کردیا گیا۔ تاہم اس کے یوزر انٹرفیس کے لیے کیا جانے والا بیشتر کام ونڈوز 11 میں منتقل کردیا گیا ہے۔

ایک اور اہم تبدیلی  جو اس ونڈو میں کی گئی ہے وہ یہ ہے کہ اس  ونڈوز کے ٹاسک بار میں ایک نیا آئیکون وجیٹ نظر آئے گا اور توقع ہے کہ اس کی مدد سے ڈیسک ٹاپ پر خبریں، موسم اور صارف کا دوسرا پسندید مواد پن کیا جا سکے گا۔ ونڈوز 11 میں اپ ڈیٹڈ ڈارک اور لائٹ موڈز موجود ہیں جو موجودہ ونڈوز کے مقابلے میں  کہیں زیادہ بہتر ہے۔ گیمرز کی بات کریں تو مائیکرو سافٹ نے ونڈوز 11 میں ایک ایکس باکس ایپ شامل کی ہے تاکہ گیم پاس تک جلد رسائی ہو سکے۔

اس نئے آپریٹنگ سسٹم میں ایک نئی چیز اسنیپ لے آؤٹ ہے جو فوری طور پر ایپس کو اسنیپ کرنے میں مددکرتی ہے جس کے لیے ونڈوز 11 میں متعدد موڈز سپورٹ کے لیے دیئے گئے ہیں۔ ونڈوز 11 میں اسنیپ گروپ لے آؤٹس بھی موجود ہیں جس میں وہ ایپس ہوتی ہیں جو آپ  محفوظ  کرتے ہیں۔ یہ نیا آپریٹنگ سسٹم متعدد مانیٹرز پر کام کرنے کو مدد کرے گا اور اس بات کو یقینی بنائے گا کہ ایپس ہمیشہ درست اسکرین پر  کھلے  ہوں۔مائیکرو سافٹ کی جانب سے اسکائپ کی بجائے ٹیمز کو بھی اہمیت دی گئی  ہے  اور مائیکرو سافٹ  نے  مائیکرو سافٹ ٹیمز کو بھی براہ راست ونڈوز 11 کا حصہ بنادیا ہے جو ٹاسک بار میں ہوگا، اس کی مددسے صارفین اپنے دوستوں، گھروالوں یا دفتر کال کرسکیں گے۔ونڈوز ویجیٹس اور ٹچ فیچرز بھی اس نئے آپریٹنگ سسٹم کا بڑا حصہ ہیں، ویجیٹس ایسی پرسنلائزڈ فیڈ ہے جو اے آئی پاور سے لیس ہے۔

ونڈوز 11 کی ایک سب سے بڑی سے بڑی تبدیلی نیا ایپلی کیشن  اسٹور ہے جس کو ازسر نو ڈیزائن  کرتے ہوئے متعدد ایپس کی سپورٹ فراہم کی جائے گی، جو اس وقت ونڈوز ایپ اسٹور میں دستیاب نہیں۔ان میں اڈوب کریٹیو سیوٹ، اینڈرائیڈ ایپس بشمول ٹک ٹاک اور انسٹاگرام  سرفہرست ہیں۔ ونڈوز 11 عام صارفین کو رواں سال کے آخر تک دستیاب ہوگی تاہم ڈویلپرز کے لیے یہ مختلف بیٹا ورژنز میں دستیاب ہوگی۔