مال روڈ (زاہد چودھری) عید الاضحٰی پر صفائی مہم کی تعریف، سماجی رابطے کی ویب سائٹ ٹو یٹر پر بھی صاف پنجاب شاباش بزدار ٹاپ ٹرینڈ بن گیا۔
وزیر اعلیٰ پنجاب سردار عثمان بزدار نے صفائی آپریشن احسن طریقے سے مکمل کرنے پر سالڈ ویسٹ مینجمنٹ سمیت تمام اضلاع کی انتظامیہ کی کارکردگی کو سراہا، عید الاضحٰی پر صفائی کے بہترین انتظامات پر ٹویٹر صارفین کی جانب سے بھی پنجاب حکومت اور سالڈ ویسٹ مینجمنٹ سمیت انتظامیہ کی کارکردگی کو سراہا گیا ۔
وزیر اعلیٰ پنجاب سردار عثمان بزدار نے بھی ٹویٹ کے ذریعے سالڈ ویسٹ مینجمنٹ اور ضلعی انتظامیہ کی کارکردگی کو سراہا۔ وزیر اعلیٰ پنجاب نے عیدالاضحیٰ کے تینوں روز لاہور سمیت پنجاب بھر میں صفائی کے انتظامات پر متعلقہ اداروں کو شاباش دیتے ہوئے کہا کہ صفائی کے بہترین انتظامات پر سالڈ ویسٹ مینجمنٹ کمپنیاں اور انتظامیہ مبارکباد کی مستحق ہے، صاف ستھرا پنجاب کیلئے سب نے ٹیم ورک کے طور پر کام کیا، سالڈ ویسٹ مینجمنٹ کمپنیوں اور انتظامیہ نے جذبے، جانفشانی اور محنت سے اپنے فرائض ادا کیے۔
وزیراعلیٰ عثمان بزدار نے کہا کہ شہروں میں اگرچہ صفائی کے انتظامات اچھے رہے لیکن ان میں بہت بہتری کی گنجائش ہے، صاف ستھرا ماحول صحت مند معاشرے کی علامت ہے۔
وزیراعلیٰ پنجاب سردار عثمان بزدار نے عیدالاضحیٰ پرعوام کی جان ومال کے تحفظ کیلئے صوبے بھر میں سکیورٹی کے بہترین انتظامات پر اطمینان کا اظہار کیا ہے اور عید ڈیوٹی کرنے والے انتظامی و پولیس افسران اور اہلکاروں کو شاباش دی۔