سٹی42: پاکستان کی آرمڈ فورسز کے چیفس اور سٹاف نے کرسمس کی عید اور بانی پاکستان کے 148ویں یومِ پیدائش پر عوام کے لئے خصوصی تہنئیتی پیغامات میں کہا ہے کہ ہم سب محبت، امن اور اخوت کی عالم گیر اقدار کو مل کر سیلیبریٹ کر رہے ہیں اور قائد کے اتحاد، ایمان اور نظم و ضبط کے اصولوں کے لئے اپنی غیر متزلزل وابستگی کا بھی اعادہ کرتے ہیں۔
قائداعظم محمد علی جناح کے یوم پیدائش کے موقع پر چیئرمین جوائنٹ چیفس آف سٹاف کمیٹی، مسلح افواج کے سربراہان اور افواج پاکستان نے بابائے قوم کو خراج عقیدت پیش کیا ہے،اپنے پیغام میں مسلح افواج نے کہا ہے کہ پاک فوج قائداعظم کے لازوال وژن اور بے مثال قیادت کو خراج تحسین پیش کرتی ہیں،بابائے قوم کی انتھک کوششوں نے ہمارے عوام کو متحد کیا اور ایک خودمختار اور آزاد پاکستان کی بنیاد رکھی،اس دن ہم اتحاد، ایمان اور نظم و ضبط کے ان کے رہنما اصولوں کے لیے اپنی غیر متزلزل وابستگی کی تجدید کرتے ہیں۔
آئی ایس پی آر کے مطابق کرسمس کے موقع پر مسلح افواج کے چیفس نے پاکستان کے مسیحی عوام کے لئے تہنئیتی پیغام بھیجا ہے، اپنے کرسمس کے پیغام مین پاکستان کی آرمڈ فورسز کے سربرتاہوں نے کہا کہ کرسمس کے پر مسرت موقع پر مسیحی برادری کو دلی مبارکباد دیتے ہیں، اپنے مسیحی بھائیوں اور بہنوں کے ساتھ یکجہتی کے طور پر، ہم محبت، اخوت اور امن کی عالمی اقدار کو مل کر سیلیبریٹ کر رہے ہیں۔
آئی ایس پی آر کے مطابق مسلح افواج قوم کی حفاظت اور وطن کی خدمت میں انصاف، مساوات اور ہم آہنگی کے نظریات کو برقرار رکھنے کے لیے پرعزم ہیں۔