ویب ڈیسک: سوشل میڈیا پلیٹ فارم ٹیلی گرام کے بانی اور سی ای او پاؤل دورو کو فرانس میں گرفتار،پاول دورو کو پیرس ایئرپورٹ سے گرفتار کیا گیا، آج فرد جرم عائد کئے جانے کا امکان ہے۔
تفصیلات کےمطابق فرانسیسی میڈیا کے مطابق پاول دورو آزربائیجان سے اپنے نجی طیارے کے ذریعے پیرس پہنچے تھے جہاں انہیں حکام نے گرفتار کرلیا۔
رپورٹ میں بتایا گیا ہے کہ 39 برس کے پاول دورو روس اور فرانس دونوں ممالک کی شہریت رکھتے ہیں۔ان پر قانون نافذ کرنے والے حکام سے عدم تعاون، منشیات کی اسمگلنگ، کمسنوں سے مجرمانہ فعل اور دھوکہ دہی میں ملوث ہونے کا شبہ ظاہر کیا گیا ہے، ٹیلی گرام کے سی ای او پر آج فرد جرم عائد کیے جانے کاامکان ہے۔
واضح رہے کہ پاول دورو روس میں پیدا ہوئے تھے تاہم اپنا سوشل میڈیا پلیٹ فارم بند کرنے سے متعلق مطالبات تسلیم کرنے سے انکار کرتے ہوئے انہوں نے 2014 میں روس چھوڑ دیا تھا، ٹیلی گرام روس، یوکرین میں خاص طور پر مقبول ہے۔