ویب ڈیسک:  سعودی ایئرلائن نے حج 2025 کے پیش نظر حجاج کرام کے لیے ٹھنڈے احرام متعارف کرانے کی تیاریاں مکمل کر لی ہیں۔ اس جدید احرام کو گرمی سے بچاؤ کے لیے خصوصی ٹیکنالوجی کی مدد سے تیار کیا گیا ہے۔

سعودی ایئرلائن کے مارکیٹنگ منیجر عصام اخونبائی کے مطابق یہ احرام اس طرح ڈیزائن کیا گیا ہے کہ انسانی جسم کو ٹھنڈا رکھ سکے۔ ایک معروف اخبار سے گفتگو میں ان کا کہنا تھا کہ اس منصوبے میں ایک امریکی کمپنی کا تعاون بھی حاصل رہا۔

عصام اخونبائی نے بتایا کہ یہ احرام دبئی میں منعقدہ عربین ٹریول مارکیٹ (ATM 2025) میں باضابطہ طور پر پیش کیا جائے گا۔

انہوں نے مزید وضاحت کی کہ احرام کی تیاری میں استعمال ہونے والی ٹیکنالوجی ایسی ہے جو جلد کو گرمی کی شدت سے بچانے میں مدد دیتی ہے اور یہ درجہ حرارت کو 1 سے 2 ڈگری سینٹی گریڈ تک کم کر سکتی ہے، جس سے حجاج کرام کو گرمی کا احساس کم ہوتا ہے۔

یاد رہے کہ ٹھنڈے احرام کا آغاز رواں سال جون سے کیا جا رہا ہے جو حجاج کرام کے لیے ایک انقلابی اور سہولت بخش اقدام قرار دیا جا رہا ہے۔