ویب ڈیسک: دورہ پاکستان کے حوالے سے ویسٹ انڈین کرکٹ بورڈ کاکہنا ہے کہ ہمارا دورہ پاکستان سمیت کسی بھی دورے کی کمٹمنٹ پوری کرنے کا ارادہ ہے۔
تفصیلات کے مطابق ویسٹ انڈین کرکٹ بورڈ کا کہنا ہے کہ پاکستان سمیت کسی بھی ٹور کی کمٹ منٹ پوری کرنے کا پلان ہے، ہمارا ارادہ یہی ہےکہ ہم ٹورز کی ذمے داریاں پوری کریں گے۔ ویسٹ انڈیز کرکٹ بورڈ کے سی ای او جانی گریو کا کہنا ہے کہ ہم ماضی کی طرح اپنے دورے سے قبل تمام ضروری عمل کا جائزہ لیں گے اور ویسٹ انڈیز پلیئرز ایسوسی ایشن اور کھلاڑیوں سے بات کریں گے۔
سی ای اوکرکٹ ویسٹ انڈیز جانی گریو کا کہنا ہے کہ ہماری مینز اور ویمنز ٹیم پاکستان میں کھیل چکی ہیں، اس وقت ہمارا فوکس ٹی ٹوئنٹی ورلڈ کپ پر ہے۔جانی گریو نے کہا کہ منگل کو سی ای او پاکستان کرکٹ بورڈ وسیم خان سے ٹیلی فون پر بات ہوئی، گزشتہ ہفتے کے دوران پاکستان میں جو ہوا اس پر بات ہوئی۔
یاد رہے کہ ویسٹ انڈیز نے تین ون ڈے اور تین ٹی ٹوئنٹی میچز کی سیریز کھیلنے کے لیے پاکستان آنا ہے تاہم نیوزی لینڈ اور انگلینڈ کی جانب سے اپنے دورے منسوخ کیے جانے کے بعد ویسٹ انڈیز کے دورہ پاکستان پر بھی خدشات ظاہر کیے جارہے ہیں۔