راؤ دلشاد : وزیر اطلاعات پنجاب عظمیٰ بخاری نے کہا ہےکہ لاہور میں تمام شاہراہیں کھلی ہیں ،معمولات زندگی رواں دواں ہے، لاہور میں بیشتر جگہوں پر مارکیٹیں بھی کھلی ہیں ۔
عظمیٰ بخاری نے لاہور مختلف علاقوں لکشمی چوک،شملہ پہاڑی،حاجی کیمپ اور ریلوے اسٹیشن کا دورہ کیا، انہوں نے لاری اڈہ،مینار پاکستان اور آزادی فلائی آور کا وزٹ کیا۔ اس کے علاوہ عظمیٰ بخاری نے اندرون شہر ،مال روڈ ،جی پی او چوک ،چیئرنگ کراس چوک کے بھی دورے کیے۔ عظمیٰ بخاری نے لاہور میں ٹریفک کی روانگی اور امن و امان کی صورتحال کا جائزہ لیا۔
عظمیٰ بخاری نے اس موقع پر گفتگو کرتے ہوئے کہا کہ پنجاب کے عوام نے فتنے اور فتنہ پارٹی کو ریجکٹ کردیا ہے، مجھے لاہور میں تحریک انصاف کا ایک بھی انقلابی نظر نہیں آیا ، تحریک انصاف کی لاہور کی قیادت بھی غائب ہے ، پنجاب میں بھی تحریک انصاف کے لوگوں کے نکلنے کی کوئی خیر خبر نہیں آئی ۔