(ویب ڈیسک) سابق اداکارہ اور ماڈل زینب جمیل کا لاہور میں قاتلانہ حملے کے بعد اہم بیان سامنے آگیا۔
تفصیلات کے مطابق موٹر سائیکل پر سوار دو حملہ آوروں نے اس وقت اداکارہ کو قاتلانہ حملے کا نشانہ بنایا جب وہ اپنے سیلون کے سامنے اپنی گاڑی سے اُتر رہی تھیں۔ ملزمان کی فائرنگ سے اداکارہ کو 6 گولیاں لگیں، ملزمان فائرنگ کےفوری بعد فرار ہوگئے۔
اداکارہ زینب جمیل کا اپنے بیان میں کہنا ہےکہ اُنہیں فون پر سنگین دھمکیاں مل رہی تھیں جبکہ دھمکی آمیز خطوط بھی بھیجے گئے تاہم وہ ملزمان کو نہیں جانتی۔
اُن کا کہنا تھا کہ مجھے کچھ افراد پر شبہ ہے جن کا نام پولیس کو بتا چکی ہوں، یہ کوئی ڈکیتی کی واردات نہیں مجھ پر حملہ ہوا ہے۔ اُنہوں نے اپنے شوہر پربھی شبہ ظاہر کیا ۔ یاد رہے کہ اداکارہ اور ان شوہر کے درمیان 2 سال سے اختلافات چل رہے ہیں۔
اداکارہ نے وزیراعلیٰ پنجاب سے ملزمان کو جلد گرفتار کرنے کی اپیل کی ہے۔
پولیس نے زینب جمیل کے ماموں کی مدعیت میں 2 نامعلوم حملہ آوروں کے خلاف مقدمہ درج کر رکھا ہے۔ پولیس کا کہنا ہے کہ تحقیقات جاری ہیں، ملزمان کا جلد سے جلد سراغ لگا کر انہیں گرفتار کر لیا جائے گا۔