عابد چودھری: کاہنہ میں اندھے قتل کا ڈراپ سین، بھتیجا ہی چچا کا قاتل نکلا۔ سی آئی اے کاہنہ نے چچا کے اندھے قتل کی واردات میں ملوث بھتیجا اور چچی ساتھی سمیت گرفتار کرلئے۔
ایس ایس پی سی آئی اے شعیب خرم جانباز کے مطابق گرفتار ملزموں میں مزمل امتیاز احمد، شعیب اور فوزیہ شامل ہیں۔ دوران کارروائی گرفتار ملزموں سے آلہ قتل پسٹل، موٹر سائیکل اور گولیاں برآمد کرلی گئی۔ پولیس کا کہنا ہے کہ ملزم مزمل کے اپنی چچی فوزیہ کے ساتھ ناجائز تعلقات تھے، ملزم نے چچی سے مل کر چچا کو راستے سے ہٹانے کا بھیانک منصوبہ بنایا۔ پولیس کا مزید کہنا ہے کہ ملزم واردات کے بعد موقع سے فرار ہوگئے تھے۔

دوسری جانب حوا کی ایک اور بیٹی  خاوند کے تشدد سے جان کی بازی ہار گئی،ملزم شہزاد نے گھریلو ناچاقی پر37 سالہ انیلا کو تشدد کا نشانہ بنایا تھا،3 بچوں کی ماں انیلا کو جنرل ہسپتال منتقل کیا گیا لیکن وہ جانبر نہ ہوسکی۔  واقعے کے بعد ملزم موقع سے فرار ہونے میں کامیاب ہو گیا، پولیس نے لاش مردہ خانے منتقل کر کے قانونی کارروائی شروع کردی ہے۔

قبل ازیں ایسا ہی ایک افسوسناک واقعہ کاہنہ کے علاقے میں پیش آیا تھا جہاں خاوند نے بیوی کے سر پر راڈ مار کر خاتون کو ابدی نیند سلا دیا تھا۔ پولیس تحقیقات کے مطابق شوہر نے خاتون سے پیسوں کا مطالبہ کیا تھا، خاتون کے انکار کرنے پر اسے بدترین تشدد کا نشانہ بنایا اور بیوی کے سر پر راڈ مار کر خاتون کو ابدی نیند سلا دیا تھا۔ پولیس کا مزید کہنا تھا کہ خاتون شمیم بی بی لوگوں کے گھروں میں کام کرتی تھی، شمیم بی بی بیماری کی وجہ سے کام پرنہیں جارہی تھی۔