سٹی42: پہلگام واقعے پر کانگریس کے رہنما نے مودی سرکار کے ہندوتوا فلسفہ کو مسلط کرنے کی زہریلی پالیسی کی سخت مذمت کی ہے۔
پہلگام واقعے نے جہاں مقبوضہ کشمیر میں 7 لاکھ بھارتی فوجیوں کی نااہلی کو بے نقاب کردیا وہیں مودی سرکار کی ہندوتوا کو مسلم کمیونٹی پر مسلط کرنے کی زہریلی پالیسی کے ہولناک اثرات کا بھانڈا بھی پھوڑ دیا۔
کانگریس کی سربراہ سونیا گاندھی کے داماد اور پریانکا گاندھی کے شوہر رابرٹ وڈرا نے بھی پہلگام واقعے پر مودی سرکار پر سخت تنقید کی ہے۔
بھارتی میڈیا کے مطابق پریانکا گاندھی کے شوہر رابرٹ وڈرا نے ہندوتوا مسلط کرنے کی پالیسی کو تنقید کا نشانہ بناتے ہوئے کہا کہ جب نفرت آمیز نظریات کا پرچار کیا جائے گا تو اس کا ردعمل بھی سخت آتا ہے۔
رابرٹ وڈرا نے مزید کہا کہ بھارت میں مسلمانوں اور مسیحیوں اور دوسری اقلیتوں کو مذہبی آزادی حاصل نہیں۔ مسجد کو مندر بنایا جا رہا ہے جب کہ گرجا گھروں کو آگ لگائی جا رہی ہے۔ بھارت میں اقلیتوں میں عدم تحفظ بڑھتا جا رہا ہے،
انھوں نے کہا کہ پہلگام کا واقعہ اسی نفرت آمیز ہندوتوا کو مسلط کرنے کی سوچ کا ردعمل ہوسکتا ہے۔