(راؤ دلشاد)وزیر اعلیٰ پنجاب مریم نواز نے کہا ہے کہ سی پیک محض ایک منصوبہ نہیں، دو قوموں کے لیے اُمید، ترقی اور خوشحالی کی علامت ہے۔
مریم نواز نے عوامی جمہوریہ چین کے 75 ویں قومی دن کی تقریب میں شرکت کی اور چینی قونصل جنرل ژاؤ شیریں سے ملاقات کر کے قومی دن پر مبارک باد دی۔
تقریب سے خطاب کرتے ہوئے مریم نواز نے کہا کہ چین کے قومی دن پر پاکستان کے لوگوں کی طرف سے مبارک باد پیش کرتی ہوں، پنجاب کے لوگ چینی بھائیوں بہنوں کو دلی مبارک باد پیش کرتے ہیں۔
انہوں نے کہا کہ چینی قوم نے ترقی کے ساتھ ساتھ دنیا کی طرف دوستی کا ہاتھ بھی بڑھایا، سی پیک پاکستان کے معاشی منظر نامے کو تبدیل کر رہا ہے، پاور کوریڈور سے لے کر عام شہریوں کے دلوں تک چین نے گھر کر لیا ہے۔
مریم نواز کا کہنا ہے کہ چین کی عظمت امن، تعاون، انسانیت کی بھلائی کے غیر متزلزل عزم میں مضمر ہے، ہم عظیم چینی قوم کا احترام کرتے ہیں، چین کی کامیابیاں ہمارے لیے بھی حوصلہ افزائی اور قابل تقلید ہیں۔
وزیر اعلیٰ پنجاب نے کہا کہ ضرورت کی ہر گھڑی میں چین پاکستان کے ساتھ کھڑا رہا ہے، پاکستان اور چین خوشحالی اور پُرامن مستقبل کی طرف ہاتھ تھام کر آگے بڑھ رہے ہیں، ہر عالمی بحران میں چین کا کردار ناقابل فراموش ہے۔
ان کا کہنا ہے کہ چین ایک ایسے رہنما کے طور پر ابھرا جس کا وژن سرحدوں سے ماورا ہے، پاک، چین دوستی دل اور روح کا رشتہ ہے، ہمارے مشترکہ مستقبل کا ایک اہم ترین ثبوت چین پاکستان اکنامک کوریڈور ہے۔
چینی قونصل جنرل نے خطاب میں وزیرِ اعلیٰ پنجاب کے عوام دوست اقدامات کو خراج تحسین پیش کرتے ہوئے نواز شریف آئی ٹی سٹی، کینسر اسپتال، ایئر ایمبولینس اور اپنی چھت اپنا گھر پروگرام کا ذکر کیا۔
انہوں نے کہا کہ سولر پینل پروگرام سے عوام کو حقیقی ریلیف ملے گا۔