(مانیٹرنگ ڈیسک) معروف بھارتی اداکارہ سشمتا سین نے قرآن پاک کی سورۃ العصر کی تلاوت کرکے مسلمان مداحوں کے دل جیت لیے۔
چند روز قبل بالی وڈ اداکارہ سشمتا سین نے اپنے انسٹاگرام اکاؤنٹ پر بچوں کے ہمراہ لائیو سیشن کیا اور اس دوران اداکارہ نےمسلمان مداحوں کی درخواست پر سورۃ العصر کی تلاوت کی۔بعد ازاں سشمتا سین کی تلاوت کلام پاک کی ویڈیو سوشل میڈیا پر وائرل ہوگئی اور پاکستانی مداحوں کی جانب سے ان کی تعریفیں کی گئیں۔
لائیو سیشن کے دوران اداکارہ سے ملتان کے ایک مداح نے ان سے پاکستان آنے سے متعلق ایک سوال کیا۔جس کا جواب دیتے ہوئے سشمتا سین نے کہا کہ 'امید ہے کہ بہت جلد پاکستان آؤں، میں 3 مرتبہ کراچی آچکی ہوں اور تینوں ہی مرتبہ مجھے یہاں سے بے حد محبت ملی۔
واضح رہےکہ اس سے قبل بھی اداکارہ نے سورۃ العصر کی تلاوت کرکے مسلمانوں کو رمضان المبارک کی مبارکباد دی تھی جسے مداحوں نے بے حد پسند کیا تھا۔
یاد رہےکہ اداکارہ سشمتا سین نے 1996 میں فلم دستک سے اپنے بالی وڈ کیرئیر کا آغاز کیا، انہوں نے 1999 میں فلم بیوی نمبرون میں بہترین اداکاری کے جوہر دکھا کر بہترین معاون اداکارہ کا فلم فیئرایوارڈ جیتا، سشمتا فلم دستک، میں ہوں نا، زندگی راکس، دولہا مل گیا اور دیگر کئی فلموں میں اداکاری کے جوہر دکھا چکی ہیں۔