سٹی 42 : ایف آئی اے گجرانوالہ زون نے کارروائی کرتے ہوئے مراکش کشتی حادثے میں ملوث انسانی سمگلر گرفتار کرلیا ۔ 

 ایف آئی اے کے مطابق ملزم کی شناخت محمد اسلم کے نام سے ہوئی، ملزم کو چھاپہ مار کاروائی میں سمبڑیال سے گرفتار کیا گیا۔ ملزم نے دیگر ساتھیوں کے ساتھ مل کر متاثرہ عامر علی کو اسپین بھجوانے کی کوشش کی، ملزموں کی جانب سے متاثرہ کو پہلے موریطانیہ بھجوایا گیا، انہوں نے دیگر ساتھیوں کے ساتھ مل کر متاثرہ کو کشتی کے ذریعے اسپین اسمگلنگ کی کوشش کی گئی، کشتی حادثے کے نتیجے میں متعدد پاکستانی جاں بحق ہوئے۔

کشتی حادثے میں متاثرہ کو مراکش حکام نے ریسکیو کیا، متاثرہ عامر علی کا نام وزارت خارجہ کی جانب سے جاری کردہ فہرست میں شامل ہے ۔ 

ڈائریکٹر گجرانوالہ زون عبدالقادر قمر کا کہنا ہے کہ ملزموں نے متاثرہ کو بیرون ملک بھجوانے کےلئے اہلخانہ سے 53 لاکھ 50 ہزار روپے ہتھیائے، ملزم کے خلاف مقدمہ درج کر کے تفتیش کا آغاز کر دیا گیا، ملزم کی نشاندہی پر مزید گرفتاریاں متوقع ہیں ۔ انہوں نے کہا کہ کشتی حادثات میں ملوث عناصر کے خلاف کریک ڈاون جاری ہے۔