(مانیٹرنگ ڈیسک) اسکواش کے سابق عالمی چیمپئن جان شیر خان کی سوشل میڈیا پر وائرل ویڈیو جھوٹ پر مبنی نکلی، اسکواش لیجنڈ کے بہنوئی نے خبر کی تردید کرتے ہوئے کہا کہ سابق عالمی چیمپئن کسی ایسی خاص بیماری یا پریشانی میں مبتلا نہیں۔

 ذرائع کے مطابق سابق عالمی  چیمپئن جان شیر خان کے حوالے سے وائرل ہونے والی ویڈیو کے سبب اسکواش لیجنڈ کے عزیز و اقارب اور لاکھوں چاہنے والے مداح شدید کوفت اور ذہنی اذیت کا شکار ہوگئے، جان شیر خان کے بہنوئی اور سابق کوچ محبوب خان نے رابطہ پر پشاور سے بتایا کہ جان شیر خان بخیریت و عافیت ہیں۔

ان کا کہنا ہے کہ کسی نے مسجد میں عبادت کے دوران 8 مرتبہ کے عالمی چیمپئن اور 6 مرتبہ برٹش اوپن اسکواش چیمپئن شپ شپ جیتنے والے جان شیر خان کی ویڈیو بنا کر غلط پیغام دیا ہے، جس کی وجہ سے جان شیر خان، ان کے رشتے داروں اور محبت کرنے والوں کو سخت تکلیف اور پریشانی کا سامنا کرنا پڑا۔

محبوب خان کے مطابق پارکنسن کے مریض جان شیر خان ذہنی طور پر تندرست اور ٹھیک ہیں تاہم ان کے گھٹنوں میں تکلیف ہے، ذہنی صحت کے حوالے سے وہ بہت بہتر محسوس کر رہے ہیں اور سابق عالمی چیمپئن خدانخواستہ کسی ایسی خاص بیماری یا پریشانی میں مبتلا نہیں۔