( فہد علی ) چند روز قبل قتل ہونے والے پاکستان اٹامک انرجی کمیشن کے ملازم کے قتل کا معمہ حل ہوگیا، مقتول کو پیسوں کی لالچ میں اس کی بیوی نے اپنے آشنا کے ساتھ مل کر قتل کیا۔
پیسوں کی لالچ نے انسان کو اندھا بنادیا، بیوی نے اپنے مجازی خدا کو آشنا کے ساتھ مل کر ابدی نیند سلادیا، پولیس کے مطابق چند روزقبل ٹاؤن شپ میں عامر علی کو سر میں گولی مار کر قتل کر دیا گیا تھا، جس کی تفتیش کے لیے عامر کی بیوی نورین کو بلایا گیا، دوران تفتیش بیوی کے بیانات سے پولیس کو شک ہوا کہ جیسے معاملہ کچھ اور ہے، جب بیوی کا موبائل ریکارڈ چیک کیا گیا ور سی سی ٹی وی کیمروں سے عامر کے قتل کی تفتیش شروع کی گئی تو پتا چلا کہ جس شخص نے عامر کو گولی ماری وہ ان کا مالک مکان ہے۔
پولیس کا کہنا تھا کہ نورین نے اقرار جرم کیا ہے کہ اس کی دوستی اپنے مالک مکان نعمان سے ہوئی جس پر دونوں نے مل کر عامر کی ریٹائر منٹ کے بعد ملنے والی رقم کو ہتھیانے کا منصوبہ بنایا اور عامر علی کو ابدی نیند سلا دیا۔
پولیس کا کہنا تھا کہ قتل کی تفتیش مکمل کر لی گئی ہے، مقتول کی بیوی اور اس کے آشنا کے خلاف قتل کا مقدمہ بھی درج کر لیا گیا، دونوں ملزمان کے خلاف قانونی کارروائی جاری ہے۔