باسم سلطان: ڈی سی لاہور سید موسیٰ رضا نے سبزی و فروٹ منڈی بادامی باغ کا دورہ کیا۔
اسسٹنٹ کمشنر سٹی اور دیگر افسران بھی ڈی سی لاہور کے ہمراہ تھے، اپنے دورے کے دوران ڈی سی لاہور سید موسیٰ رضا نے سبزی و پھلوں کی فروخت کے عمل کا جائزہ لیا، منڈی میں صفائی کے ناقص انتظامات پر سیکرٹری مارکیٹ کمیٹی پر برہمی کا اظہار کیا۔
انہوں نے سرکاری نرخوں کے لئے الیکٹرانک ریٹ لسٹ فعال نہ ہونے پر ناراضگی کا اظہار بھی کیا۔
اس موقع پر واسا کو ہدایت جاری کرتے ہوئے ڈی سی لاہور سید موسیٰ رضا نے کہا منڈی میں نکاسی آب کے نظام کو بہتر بنانے کے لئے ڈسپوزل سٹیشن کو مکمل طور پر فعال رکھا جائے، منڈی میں صفائی ستھرائی کے حوالے سے سختی سے عمل کیا جائے، گراں فروشی کے خلاف فوری کارروائی اور ریٹ لسٹ آویزاں نہ کرنے والوں کے خلاف سخت اقدامات اٹھائے جائیں۔
سید موسیٰ رضا نے منڈی کے راستوں سے غیر قانونی تجاوزات کے فوری خاتمے کے احکامات جاری کئے اور عوام کو ریلیف فراہم کرنے کے لئے ہر ممکن اقدام اٹھانے کی ہدایت کی۔