(ویب ڈیسک) اسلام آباد ہائیکورٹ نے چیئرمین پی ٹی آئی عمران خان کی اہلیہ بشریٰ بی بی کو ایف آئی اے کی جانب سے جاری نوٹس معطل کردیا۔

چیئرمین پی ٹی آئی کی اہلیہ بشریٰ بی بی نے مبینہ آڈیو لیک کے معاملے پر ایف آئی اے تحقیقات کے خلاف متفرق درخواست دائرکی تھی جس میں مؤقف اختیار کیا گیا تھا کہ اس عدالت میں مرکزی کیس پہلے سے زیرسماعت ہے اور عدالت نے 18 ستمبرکو ایف آئی اے کو قانون کے مطابق کارروائی کی ہدایت کی۔

درخواست میں مزید کہا گیا کہ مرکزی کیس اب 30 اکتوبر کو سماعت کے لیے مقرر ہے، کیس زیرالتوا ہونے کے باوجود ایف آئی اے نے 19 ستمبر کو طلبی کا نوٹس جاری کردیا۔

 اسلام آباد ہائیکورٹ کے جسٹس بابر ستار نے بشریٰ بی بی کی درخواست پر سماعت کی جس سلسلے میں سردار لطیف کھوسہ چیئرمین پی ٹی آئی کی اہلیہ کی طرف سے پیش ہوئے۔

عدالت نے درخواست پر مختصر سماعت کے بعد ایف آئی اے کی طلبی کا نوٹس معطل کرتے ہوئے وفاقی تحقیقاتی ادارے سے جواب طلب کرلیا۔