(ندیم خالد) ستوکتلہ کے علاقے میں ذاتی رنجش پر شوہر نے دو بیویوں کو فائرنگ کر کے قتل کر دیا اور موقع سے فرار ہوگیا، پولیس نے مقدمہ درج کرکے ملزم کی تلاش شروع کردی۔
تفصیلات کے مطابق ستوکتلہ کے علاقے قبرستان محلہ میں شوہر نے اپنی دو بیویوں کو ذاتی رنجش پر قتل کر دیا۔حادثے کی اطلاع ملنے پر پولیس موقع پر پہنچ گئی اور لاشیں قبضہ میں لے کر پوسٹمارٹم کیلئے جناح ہسپتال مردہ خانے میں منتقل کردیں اور جائے وقوعہ سے شواہد اکٹھے کرکے مقدمہ درج کرلیا۔
لواحقین نے بتایا کہ ایک مہینے کے بعد ملزم ریاست گھر آیا، دونوں بیویوں کو بات کرنے کے بہانے کمرے میں لے گیا اور فائرنگ کر کے موت کے گھاٹ اتار دیا۔ جس کےبعد موقع سے فرار ہو گیا۔
پولیس کا کہنا تھا کہ ملزم ریاست نشے کا بھی عادی تھا۔ بشری بی بی اس کے بھائی کی بیوی تھی جس کے چار بچے ہیں اور ملزم نے اپنے بھائی کی موت کے بعد نکاح کیا تھا۔ نسرین بی بی کی چار بیٹیاں دو بیٹے جبکہ بشری کے دو بیٹے اور دو بیٹیاں ہیں۔