ویب ڈیسک:اگر آپ سے سوال کیا جائے کہ کیا ایسا ممکن ہے کہ آپ بیک وقت دو ملکوں میں موجود ہوں؟یہ سن کر آپ شاید سوال کرنے والے کو بے وقوف کہیں گے لیکن آج ہم آپ کو حیران کردیں گے کہ ایسا بلکل ممکن ہے۔

دنیا میں ایک ایسا  ہوٹل موجود ہے جہاں آپ بیک وقت دو ملکوں میں موجود ہوتے ہوئے سو سکتے ہیں۔

جی ہاں اگر آپ بیک وقت دو ممالک میں قیام کرنا چاہتے ہیں تو آپ کو فرانس اور سوئٹزرلینڈ کی سرحد ی علاقے لاکیور میں قائم ہوٹل اربیز( Hotel Arbez Franco-Suisse) پر جانا ہوگا۔

یہ ہوٹل ایک ایسی منفرد جگہ پر قائم ہے جس کے اندر سے ہی فرانس اور سوئٹزرلینڈ کی سرحدیں گزرتی ہیں اسی وجہ سے یہ دنیا کا واحد ہوٹل ہے جو ایک ساتھ دو ممالک میں واقع ہے۔

اس ہوٹل کے  منفرد مقام کی وجہ 1862 میں فرانس اور سوئٹزرلینڈ کے درمیان ہونے والا  ایک  نیا سرحدی معاہدہ ہے جسے Treaty of Dappesکہا جاتا ہے،  اس معاہدے میں فرانس اور سوئٹزرلینڈ نے سرحدی علاقے کی قریبی سڑک کا مکمل کنٹرول فرانس کو  دینے کے لیے ایک چھوٹے سے علاقے کے تبادلے پر اتفاق کیا۔

 معاہدے میں یہ بھی طے ہوا کہ دونوں ملکوں کی مشترکہ سرحدی علاقے پر قائم عمارتیں اپنے مقام پر ہی موجود رہیں گی۔ 

ایسی صورتحال میں ایک مقامی کاروباری شخص  نے سرحدی علاقے سے فائدہ اٹھانے کے لیے دونوں ملکوں کے درمیان سرحد پر ایک دکان اور بار کھولا جسے 1921 میں ایک مکمل ہوٹل اربیز میں تبدیل کردیا گیا۔

دونوں ملکوں کی سرحد پر ہوٹل قائم کرنے کی وجہ سے اس ہوٹل کا آدھا حصہ فرانس اور آدھا سوئٹزرلینڈ میں ہے، سیاح ایک ہوٹل میں قیام کرتے ہوئے بیک وقت  دو ملکوں میں موجود ہوتے ہیں۔

اس ہوٹل کے کچھ کمرے ایسے ہیں کہ اس کا آدھا حصہ فرانس اور آدھا سوئٹزر لینڈ میں ہے اسی وجہ سے اگر مہمان ان کمروں میں سوئے تو ان کا سر سوئٹزرلینڈ اور ٹانگے فرانس میں ہوتی ہیں۔ یہاں یہ بات سچ ثابت ہوگئی کہ اس ہوٹل میں قیام کرنے والا مہمان بیک وقت دو ملکوں میں نیند پوری کرسکتا ہے۔

دو ملکوں کی سرحد پر قائم ہونے کی وجہ سے اس ہوٹل میں فرانس اور سوئٹزرلینڈ دونوں کی کرنسی قابل قبول ہے جبکہ ہوٹل کے دونوں ملکوں کے لیے  الگ ، الگ فون نمبرز ہیں۔

اس کے علاوہ ہوٹل انتظامیہ کی جانب سے فرانس اور سوئٹزرلینڈ دونوں جگہ ٹیکس ادا کیا جاتا ہے۔

آپ یہ جان کر بھی حیران ہوں گے کہ اس ہوٹل کے فرانسیسی حصے میں فرانسیسی کھانے جبکہ سوئٹزرلینڈ والے حصے میں سوئس کھانے ہی مہمانوں کو پیش کیے جاتے ہیں۔

اس ہوٹل میں دونوں ملکوں کی نشاندہی کرنے کے لیے فرانسیسی اور سوئس جھنڈے بھی لگائے گئے ہیں تاکہ مہمانوں کو اندازہ ہوسکے کہ وہ ہوٹل میں رہتے ہوئے کس ملک میں موجود ہے۔