سٹی42: جامشورو کے کوہستانی علاقے میں خوفناک ٹ یفک حادثہ، بریک فیل ہونے سے مزدا الٹ گئی، 4 بچوں اور 6 خواتین سمیت 13 افراد جاں بحق، ، 20 سے زائد افراد زخمی، مقامی ہسپتال منتقل کردیا گیا۔
جامشورو کی تحصیل تھانہ بولاخان کے کوہستانی علاقےمیں ٹریفک حادثہ پیش آیا ہے، جس میں 4 بچوں اور 6 خواتین سمیت 13 افراد جاں بحق اور 20 سے زائد زخمی ہوئے ہیں۔
بلوچستان کے علاقے دریجی سے واپس بدین جاتے ہوئے مسافر مزدا الٹ گئی، حادثے میں بدین سے تعلق رکھنے والے کولہی برادری کے 13 افراد موقع پر ہی جاں بحق ہوئے۔
حادثے میں 20 سے زائد افراد زخمی ہوئے ہیں۔مسافر افراد بلوچستان کے علاقےدریجی میں گندم کی کٹائی کرکے مزدوری سے واپس بدین جارہے تھے۔ حادثے کا اطلاع ملتے ہی ریسکیو ٹیمیں جائے وقوع پر روانہ کردی گئی۔
اس سلسلے میں مقامی رکن سندھ اسمبلی ملک سکندر خان نے بتایا کہ ہم نے مقامی افراد کو بھی ریسکیو کے لئےبھیجا ہے، رات کے وقت اندہیرے کے باعث ریسکیو ٹیموں کو مشکلات درپیش ہیں، ہم نے ایمبولنسز کے علاوہ اپنی ذاتی گاڑیاں بھی جائے وقوع پر روانہ کی ہیں تاکہ زخمیوں کو جلد سے جلد حیدرآباد منتقل کیا جاسکے۔
دوسری جانب سے ایس ایس پی جامشورو محمد ظفر صدیق چھانگا نے بتایا کہ تھانہ بولاخان پولیس کی ٹیمیں بھی جائے وقوع پر روانہ کردی ہیں، پولیس تمام امدادی سرگرمیوں میں حصہ لے رہی ہے اور لاشیں مقامی ہسپتال منتقل کروائی گئی ہیں۔
جاں بحق افراد کی تاحال شناخت نہ ہوسکی ہے، پولیس کے مطابق حادثہ مزدا گاڑی کا بریک فیل ہونے کے باعث پیش آیا۔