ویب ڈیسک:  آن لائن گیمنگ پلیٹ فارمز اور سوشل میڈیا ویب سائٹس دوستی اور محبت کو پروان چڑھانے کا انتہائی موثر ذریعہ ثابت ہوتی رہی ہیں،ان کی بدولت اب تک پاکستان میں بہت سے گھر بس چکے ہیں۔

 کئی پاکستانی لڑکوں کو سوشل میڈیا پورٹلز اور آن لائن گیمنگ پلیٹ فارمز کی مہربانی سے ترقی یافتہ ممالک کی لڑکیاں جیون ساتھی کے روپ میں مل چکی ہیں۔

 عالمگیر سطح پر مقبولیت سے ہم کنار چینی آن لائن گیم پب جی نے ایک اور گھر بسادیا، چترال کے 23 سالہ شہاد حسین کی دوستی امریکا کی 18 سالہ فلورز سارہ سے ہوئی، اس دوستی کو دونوں نے ازدواجی رشتے میں بدل لیا،فلورز سارہ نے پاکستان پہنچ کر شہاد حسین سے شادی کرلی۔

 نکاح کی تقریب چترال کے نجی ہوٹل میں منعقد ہوئی، شاہی مسجد چترال کے خطیب مولانا خلیق الزماں نے نکاح پڑھایا، نکاح لڑکی کی رضامندی سے ہوا اور نکاح کی تقریب میں اُس کی والدہ بھی شریک تھیں،فلورز سارہ کا نام بدلنے کی ضرورت نہیں پڑی کیونکہ سارہ اسلامی نام ہے۔

  چترال کے علاقے مروئی کے باشندے رئیس الدین نے بتایا کہ شہاد حسین اور فلورز سارہ کی دوستی3 سال پرانی ہے،سارہ نے والدہ سے بات کی اور اُن کی رضامندی سے نکاح کیا ہے۔

 شادی کی تقریب مقامی روایتی انداز سے منعقد کی گئی، لڑکی کو روایتی عروسی جوڑا پہنایا گیا جبکہ اُس کی والدہ کوتقریب کے لیے مقامی لباس میں تیار کیا گیا، تقریب میں دور افتادہ علاقوں کی خواتین نے بھی شرکت کی۔